Clubfoot (Ke-lek) harsatnate enkawlna leh a lo reh theih nana khawvel pum huapa World Clubfoot Day hman pualin vawiin khan Aizawlah pawh Social Welfare Minister Pu P.C. Lalthanliana hovin hun hman a ni a. Zingkarah zirlai naupangten Chanmari kawn Traffic Point atangin Millenium Centre kawt thleng Clubfoot Awareness Walk an nei a. Cure Clubfoot Mizoram buatsaiha hun hman hi Health Minister Pu Lal Thanzara pawhin a telpui a ni.

Millenium Centre kawt a World Clubfoot Day puala inkhawmna hun tawi neihah hian Minister Pu P.C. Lalthanliana chuan zai (surgery) ngai lova ke-lek enkawl dan hmuchhuaktu Dr. Ignacio Ponseti piancham hriatreng nana he ni hi hman a nih thu sawiin, Cure Clubfoot Mizoram (CCFM) chu April ni 6, 2012-a Aizawl Civil Hospital-a bul tan anih atangin tun thlenga a hmalaknate fakawm a tih thu a sawi a. Social Welfare Minister chuan ke-lek chu hmuhchhuah hma apiang enkawl a awlsam rualin, Polio emaw tia ngaihpawlh vanga enkawlna dawnglo te an awm bawk thu sawiin, hemi chungchangah hian kan inhrilhhriat tam a pawimawh a ni, a ti a. Tanpui ngaite zawnchhuah hi a pawimawh rualin tanpui theitu an awm a ?ul thu sawiin, chutiang hlenchhuak tura Cure Clubfoot Mizoram in a tum leh a hnathawh a ni chu ropui a tih thu a sawi bawk.

CCFM Chairman Pi Zohmingthangi Sailo chuan thu sawi bawkin, Aizawl Civil Hospital-ah ningani apiangin Ortho OPD-ah Clubfoot Clinic hawngin Ponseti Method hmanga Ke-lek te enkawl thin a nih thu sawiin, Civil Hospital-a enkawlna hi a thlawn vek a nih thu leh, Aizawl pawn ami te tan Hospital pan tura an kalna senso leh an chhunga an mamawh engemaw chen chu Cure Clubfoot Mizoram hian a phuhruk theih thu a tarlang a. India ramah hian kumtin ke-lek nen a piang hi 50,000 anga chhut niin, Cure Clubfoot chuan India-ah mi 25,000 vel enkawl mekin, Mizoramah pawh kum 3 leh a chanve chhungin naupang leh nausen 45 enkawl niin, kumin March leh April thla chhung phei chuan kartin case thar pakhat inziaklut ang a chhut theih a nih thu Pi Zohmingthangi hian a tarlang a ni.

Cure Clubfoot Mizoram leh Mizoram Sorkar Health Department National Health Mission hnuaia Rashtriya Bal Swasthya Karyakram (RBSK) chuan November ni 13, 2015 leh kumin financial year atan April ni 20, 2016 khan thawhhona thuthlung an ziak tawh a. RBSK atangin Ke-lek zawnchhuahna sum lan a tanpui theihna awm ang te an tum anga, Cure Clubfoot Mizoram chuan a enkawl a tum thung a ni.

World Clubfoot Day thupui hi "Khawvel atanga Ke-lek piansualna umbo" a ni a. Ke-lek piansualna neite chu an kephah chhung lamah a inherh a; hemi enkawl dam tur hian zawi tete a ke sawngbawl hnu ah plaster-a tuam khawng a, pheikhawk hranpa te bun tir leh tuam chhoh zel chuan a dam theih a ni.

Vawiin World Clubfoot Day puala inkhawm hi Rev. Dr. V. Kapenga, Vice Chairman, CCFM chuan kaihruaiin, Dr. Lalnghakliana, Financial Secretary chuan Clubfoot Clinic chungchang report a pe a. Pu Lalchhuanvawra, Ke-lek vei naupang pa hnen atangin testimony ngaihthlak a ni bawk.