Vawiin chawhma dar 11 khan I & PR Conference Hall-ah State Level Media Nodal Officer te chuan Pu B. Lalthanliana, Secretary, I & PR hovin meeting pawimawh tak an nei.

He meeting hi Pu B. Lalthanliana chuan kaihruaiin, Pu Lal Thanzara, Minister I & PR etc. Chairman na hnuaiah Mizoram sorkar Secretary rual leh department Head thenkhat awmna ‘Inter Departmental Media Co-ordination Committee’ din anih thu leh he committee hian developmental department te chu Media Nodal Officer ruat theuh turin a tih thu leh tunhnai maia Chief Secretary hova department hrang hrang hotute meeting pawhin heng Media Nodal Officer te hi ko khawm a, sorkar hmalakna puanzar nise tih avanga kalkhawm an nih thu a sawi.

He meeting hian Mizoram Sorkar TV programme ‘Mizoram Hmasawnna Lamtluang’ NIB leh DDK ten thawhhona an siam, I & PR NLUP Media Cell kaltlanga chhuah thin, Zirtawpni (Friday) tin zan dar 7 - 8 a tih chhuah thin chu hman tangkai dan an sawiho a ni. Hei bakah Mizoram Journalist Association hote nena Department hmalakna a hmuna tlawh tam dan turte an rel bawk.

Pu Jim K. Chozah, Director, I & PR chuan sorkar Department ten Media ah hma an lak theih dan leh kalphung chi hrang hrangte a sawi a, Pu David L. Thangliana, Chief Media Officer pawhin ‘Mizoram Hmasawnna Lamtluang’ chu Chief Minister duhdan angin NLUP Implementing Board leh DDK ten MoU ziakin, NLUP Media Cell, I & PR chuan a enkawl ta a, chumi chu sorkar department hrang hrang ten hmang tangkai a, langtlang taka mipui hmuh turin sorkar hmalakna te pholanna ah department zawng zawngte tanla turin a sawm.

He meeting hian Inter Departmental Media Co-ordination Committee ah sawiho tur thin pawimawh tak tak an rawt a, meeting ah hian department hrang hrang officer liante an kal tha hle a ni.