Mizoram State Sanitation Task Force chu vawiin khan New Secretariat Conference Hallah UD&PA Secretary Dr.C.Vanlalramsanga kaihhruaina hnuaiah Annual Action Plan for Cleanliness Drive chungchang sawihoin an thukhawm.

Thuhma sawiin Dr.C.Vanlalramsanga chuan faina hi a taka kan nunpui theihna turin chhung tin atanga bul tan a tul thu leh, puitlingten hma hruaia, naupang zawkte chu zirtirna fumfe tak pe a, inkaihhruaina mumal tak neih a pawimawh thu a sawi a. Mizoram hi khawlaia daikal awm lohna state (open defecation free state) a puan tum anih bakah kum 2019 ah India rama State Fai Ber ni tura kalpui a nih dawn thu a sawilang bawk a ni.

Sawihonaah hian kum 2016 - 2017 chhunga faina nei tura kalpui tur hmachhawpte an sawi tlangpui a. Chung zingah chuan faina leh thianghlimna lam hawi tarlanna ‘Facebook Page’ Aizawl, district khawpui leh census town ah te siam nise an ti a. Mizoram State Cleanliness Drive Coordination Committee din a, census town thlenga committee hi siam an rawt bawk a. Hmun ualau laiah te leh school, college leh university campus ah te mitla ngei tur ‘prominent hoarding’ tar te, tlawmngai pawl leh kohhran nena thawhho te, mass media campaign buatsaihte, hmun pawimawh lai leh mihring bitna lai hmunah te bawlhhlawh bawm dah te, ran talhna hmun chauha ran talh te, faina beihpui thlakna kawnga police leh paramilitary force te bakah zirlai naupang, NCC, NSS Volunteers, scouts and guides hnik te leh vantlang inthiarna, public sanitary urinals/toilets siam te an sawiho a ni.