27/2023-2024

Aizawl, 4th March 2023: Nimin zing khan Sports & Youth Services changtu Minister, Aizawl East – II bialtu MLA ni bawk Pu Robert Romawia Royte chuan a bial chhung Tuithiang Veng mawng lam atanga motor kawng sial mek chu tlawhin, hnathawh dan leh hmabak la awm te chu PWD Engineer leh Tuithiang Veng khawtlang hruaitute nen an enho a. Tuithiang Veng Biakin kawt thlenga motor kawng hi sial luh tum anih thu Minister chuan sawiin, Tuithiang Veng thlanmual, World Bank Road bula YMA Futsal Ground siamna tur pawh a ngaihtuah sak tur thu a sawi bawk a ni.

Minister hian Dawrpui West pawh tlawhin Aizawl Civil Hospital thli vanga harsatna an tawh mek te chu Dawrpui West Welfare Committee-te nen enhoin an sawiho nghal a. Aizawl Civil Hospital thli kawngpuia luang thla thin chu veng mipuite ngaimawh leh hriselna atan pawh a pawi thei a ni tih a hriatpui thu a sawi a. An harsatna te sutkian a nih theih nan Health Department te nen tanghovin, SASCI project atanga hmalak a tum thu Dawrpui West Welfare Committee-te chu a hrilh a ni.