28/2023-2024

Champhai, the 4th April, 2023: Champhai District chhunga Sericulture Project kalpui tan mek atan kalphung leh inkaihhruainate inhrilhhriatna hun vawiin khan buatsaih a ni.

District Sericulture Office, Champhai District chuan Silk Samagra -2, Ministry of Textile, Government of India hnuaia Champhai District chhunga project kalpui tan meka hamthatna dawngtu, beneficiary-te hnenah project kalphung hrilhfiahna hun a buatsaih a. Programme hi Pi Hmingthantluangi, District Sericulture Officer (DSO), Champhai chuan kaihruaiin Directorate of Sericulture Office, Aizawl atangin Pu B.Lalchhuana, Deputy Director cum Project Coordinator, Dr. Lalthlamuana Pachuau, Sericulture Scientist leh Officer dangten an hmanpui bawk a; project hnuaia pangang khawitute tana hriattur pawimawh tak tak leh inkaihhruainate chipchiar takin an sawifiah a ni.

Champhai District chhunga Sericulture project kalpui mek hi 'Sustainable livelihood through Ericulture in East Mizoram' tia vuah niin, he project hnuaiah hian Champhai District-a chhungkaw 134 te hmalakpui tan an ni a. Project tum ber chu Eri maimaw pangang khawi hmanga farmer-te eizawnna rahbi siam sak a ni. Project kalphung leh inkaihhruaina chungchang inzirtirna programme hi District Sericulture Office, Champhaiah leh Champhai District-a Sericulture zau lian ber tur, chhungkaw 56 awmna Ngur Cluster, Ngur khuaahte hman a ni.

Sericulture Department hotute hian vawiin khan Tualcheng khuaa muga farmer-te tlawh nghalin, kumin nipuia Central Silk Board-in Tualcheng muga farmer-te muga pangang an rawn khawi puina tur hmunhmate an enfiah nghal a. Khawvel lum chho zelah India ram dangah muga maimaw pangang khawi hlawhtlin a har tak avangin Central Silk Board lama mitthiam ten boruak tha zawk Mizoram, a bikin Champhai District-ah beiseina sang tak an neih avangin Tualchengah hian kumin nipui khawlum laiin muga maimaw pangang khawi beihpui rawn thlak an tum mek a ni.