26/2023-2024

Dated Serchhip, the 4th April, 2023: Vawiin khan Er. Lalrinawma, Social Welfare etc. Minister leh Bialtu MLA ni bawk chuan Chhiahtlang Hmarveng YMA Branch Silver Jubilee, Zo khua, Chhiahtlanga an hman chu khuallian niin  a hman puia, hemi puala buatsaih Lungphun hawnna leh Souvenir a  tlangzarh bawk.

Er. Lalrinawma chuan, Kristianna nena kalkawp tura min din sak pawl thinghlim YMA, Hmar Veng Branch-in Silver jubilee hial a lawm thei chu lawmawm a tih thu sawiin, Jubilee hi inremna leh hmasawnna thlentu ni se a duh thu a sawi a. "YMA chu a dinchhan ang ngeiin Kristian nun dan tha ngaisangtu, lusun khawhar hnemtu, mi chhumchhia leh tanpui ngaite tanpuitu ni zel rawh se" a ti. YMA member te hi zonun zemawi, tlawmngaihna, aia upa te zahna kawngah leh faina kawngah midangte tihhmuhtu ni zel ang u, a ti bawk. YMA in a ngaih pawimawh thin, ram leh hnam humhalh te, ruihhlo do te, zirna uar te hi sorkar pawhin a ngai pawimawh hle a, nasa takin kawng hrang hrangah hma a la reng a ni. Sawrkarin hmasawnna atana hma a lakna tinrengah tlawmngaipawl leh khawtlang mipuiten an thawhpui thin tih sawiin, lawmthu a sawi bawk. Tuikum Bial enkawlna kawngah theih tawp a tawiawm a, tawngtai sak zel turin mipuite a sawm bawk a ni.

Jubilee lawmna inkhawm hi Pu Hmangaihchhunga, Vice President in a kaihruai a, Pu Lalneihkima President-in inlawmna thu a sawi a, Pu Eric Lalbiakdika, Secretary-in report a pek hnuah, Pu PC Vanlalluna, Secretary, Sub-Hqrs YMA, Serchhip te,Kram Infracon Pvt Ltd aiawhin Pu Amit Goel leh Pu C Lalrawna VCP Chhiahtlang ten  thu an sawi a ni.

Chhiahtlang Hmar Veng YMA hi  Lamchhip YMA atanga indang niin kumin 2023 hi an Branch din kum 25-na champha a ni a. Tun dinhmunah YMA member 209( Mipa-180  hmeichhia-129) an awm mek a ni.

He hunah hian Kum 1998 atang Hmar Veng Branch YMA hruaitu lo ni tawh te ngaihruina thuziak hlan a nih bakah chawhnu lamah zaithiam  zai leh Cultural items  hrang hranga intihlimna an buatsaih a, Jubillee Ruai an kil ho bawk.