Aizawl East II bialtu MLA leh Minister ni bawk Pu Robert Romawia Royte chuan tukin khan a bial fan programme chhunzawmin Dawrpui Veng a tlawh a,  Dawrpui khawtlang mamawh hrang hrang te a hmunah kalin a en nghal a ni.

Pu Robert Romawia chuan Pu Zoramthanga kaihhruai Sorkar thar chuan huapzo leh langtlang sawrkar siam a nih theih nan Minister lak luh programme-ah pawh a vawi khatna leh a hmasa ber ni turin Mizo tawng hmangin thutiam lak a nih bakah Pathian thu nen a fakna hla nen hun hman a ni, a ti a. Mizoram hmasawnna turin sawrkar chuan theihtawp a chhuah dawn a, tun thla hnih chhung lekah pawh sawrkar hmalakna a tam tawh hle a ni, a ti. Ram hruaitu ten an vei phawt chuan hun reilo te chhungin kawngpui siam te pawh a lo tih theih hle tih hi a lang reng, a ti a, zu zawrh tih tawp chungchang pawh sawiin Minister chuan  Cabinet meeting hmasa ber chuan sawrkar zu zawrh a tih tawp nghal thu a sawi bawk.

Bialtu MLA chuan Aizawl West II huam chhunga Dawrpui veng chu Aizawl hmel lanna pakhat a nih avangin veng chhung mamawh khawtlang hruaituten an sawi chu ngaih pawimawh a nih tur thu a sawi a. Amah hmu duh leh a hnena mamawh thlen duhte tan Minister Office-ah hmuh theih a nih thu sawiin in lama interview lak thin sawrkarin a tihtawp chu mipui tan thil tih a awlsamna tur an ngaihtuah vang zawk a nih thu a sawi bawk.

Minister bial fang hi Mizoram State Sports Council Secretary, Sports & Youth Services Director, Tourism Director, Chief Informatics Officer, EE PWD Project (Div.) EE Aizawl Road North ten an tawiawm a. Dawrpui Multipurpose Centre-ah Dawrpui Local Council kaihruainain Minister leh Dawrpui khawtlang hruaitu te chuan inkawmhona hmangin khawtlang hruaitute chuan an mamawh hrang hrang te Minister hnenah hian an thlen a ni.