No.712/2021-2022

Aizawl, the 28th May 2021 : Vawiin khan sa leh thlai man bithliah tura ruat Committee - ‘Committee for Fixation of Price of Meat, Vegetables and Fruits within Aizawl Municipal Council (AMC)’, Aizawl DC Dr. Lalhriatzuali Ralte kaihhruaina hnuaia din chuan Committee bituk angin sa leh thlai an zuar em tih endikin khawpui chhunga bazar hrang hrang an tlawh kual.

Bawngkawn Bazar, Chanmari kawng dung, New Market chho leh Kulikawn kawngpui dunga thlai leh sa zawrhnaah te sa leh thlai man te zawtin, anhnah kg in an zuar em tih te, a buk a dik em tih te leh Committee in rate a bituk angin thlai hrang hrangte chu zawrh an ni em tih an en a. Committee chuan Bawngkawn Bazarah thlai leh sa zuartute inthut hnaih lutuk chu tun boruakah mipui, a leitute leh a zuartute tan ngei pawh a him tawk lo nia an ngaih thu an sawi a, LLTF te berawnin sa leh thlai zawrhna hi hmun dang remchangah sawn tura ngen ni se, an ti.

Hmun hrang hrang an fankualnaah bawngsa, arsa leh sangha te chu Committee-in rate a bituk angin zawrh a ni tih hmuh a ni a. New Market artui zawrhna hmun hrang hrang an tlawhnaah artui rate hi a in ang lo hle tih hmuh a ni a, a zuartute chu tun dinhmunah Committee in rate a bituk aia sanga hralh lo turin an hrilh a, Committee chuan heng artui zuartuten Karimganj atanga an lakna challan enfiah turin a copy te an la a ni.

Thlai thenkhat chu Committee-in rate a bituk aia sanga zawrh a nih laiin a then te chu an rate bituk aia tlawma zuar te pawh an awm a, thlai thenkhatte chu rate anga zawrh a ni tih hmuh a ni bawk. Anhnah te hi hmun tam zawkah a kg angin zawrh a ni lova, a tel anga zuar an la tam hle.

Vawiina market fankualnaah hian Committee Chairman Aizawl DC Dr. Lalhriatzuali Ralte; Member Secretary Addl. Director Commerce and Industries; leh Member – Food , Civil Supplies & Consumer Affairs Director leh Controller Legal Metrology Pi Ramdinliani; Pu H.D. Lalrintluanga; Horticulture Director Dr. Saipari; AH & Vety Director Dr. H. Laltlanmawia; Fisheries Director leh Aizawl City Local Association President te chu an tel a ni.