1039/2022-2023
Aizawl, the 24th June 2022: Vawiin chawhma khan Pu Lalrinenga Sailo, Aizawl Mayor chuan Tuikual South-a AMC building sak mek a tlawh a. He building tharah hian Mizoram Assembly House chhehvel a thilzuar (vendors)-te chu Assembly House venhimna kalpui a awlsam zawk na turin sawn an la ni dawn a ni.

Mizoram rorelna sang ber, Mizoram Assembly House bul kawngsirah hian phalna pek nilo thil zuar an tam hle a. Hei hi Assembly house himna leh zahawmna atana pawi thei a nih avangin mumal zawka kalpui a tul hle a; chuvangin AMC hmalaknain chawhmeh leh thildang zuartute (vendors) awmna atan he building hi sak a lo ni ta a ni.

He building sak hna hi Central Sawrkar atanga pawisa rawn kal, khawpuia chengte tana basic service hrang hrang changtlung zawk pek theihna tur AMRUT Mission hnuaia projects, Urban Local Body (ULB) kaltlanga thawhna tur sum AMC-in a dawn atanga sak tan a ni a. AMRUT Mission Statement & Guidelines 8.1-nain a tarlan angin AMRUT hnuaia project-te hi ULB (AMC) thawh (execute) tur a ni a, amaherawhchu AMC a thawktu indaihlo nia ngaiin State sorkarin a tam zawk a lo thawk tawh a ni. AMC in AMRUT fund atanga a dawn, Rs. 296.62 hmangin parking lot tur a sa tan a. AMC hian sum tam zawk ruahman belh lehin multipurpose building hi sak a lo ni ta a ni. AMC building sak nan hian AMC chuan cheng nuai 1013 vel a seng dawn a. Building hi sak zawh tep tawh niin, hun reiloteah tangkai taka hman tan theih beisei a ni.

AMC building hi chhawng sarih (7) a sak a ni a; A chhawng 4-na leh 5-na hi thlai zawrhna hmun tura ruahman niin chawmhmeh zuar - 171 leng thei tura siam a ni. A chhawng hnuai pathumte hi motor park-na tura ruahman niin, car - 35 leh two-wheeler – 35 leng tura duan a ni. Chhawng 6-na hi shopping area tur niin hetah hian shop (dawr) 17 a awm thei dawn a; chhawng 7-na, a chhawng chung ber hi Auditorium/Hall tura ruahman niin mipui 200 thut theihna tura duan a ni bawk.

Aizawl Mayor hi Pu R. Thanglura, Dy. Mayor; Pi B Lalawmpuii, Executive Councillor; Pu Lalringliana, Executive Councillor; Councillor te leh Pu Zothanmawia, Municipal Commissioner; Pu Zohmingthanga, EE leh official dang ten an tawiawm a ni.