Nimin khan UD&PA Secretary Dr. C. Vanlalramsanga hovin Planning & Programme Implementation Department Conference Hall-ah Aizawl Smart City chungchang sawiho a ni.

Kum 2015 a in tan, Smart Cities Challenge ah hian India ram khawpui hrang hrang thlan an ni tawh a. Round khatnaah khawpui 97 atangin 20 thlan an ni a, a dawta fast track competition round April 21, 2016 a neihah khan khawpui 23 atangin 13 thlan chhuah an ni. Round hnihna June 30, 2016 ah khan khawpui 63 atangin 27 thlan chhuah an ni leh a. Round thumna March 31, 2017 hian khawpui 37 an inel leh anga, hetah hian Aizawl chu thlan zingah a tel ngei theih nan Mizoram sawrkar chuan nasa takin hma a la a ni. Round hnihnaa point hmu hniam ber, Vadodara, Gujarat khan 55.38% an hmu a. Aizawl chuan 54.32% hmuin thlan zingah hian point tlemte chauhin a tel pha ta lo a ni.

Smart City Mission kaltlang hian kum 2015-2020, kum 5 chhungin India rama khawpui thlan bikah mipuite tana nitin khawsak awlsamna siam sak turin vantlang mamawh chi hrang hrang changkang zawka thawmthat tum a ni a. Heng thil tumte tihhlawhtling tur hian mipui ngaihdan la a mipui mamawh, Smart Solution chi hrang hrang - e-governance, traffic management, bawlhhlawh sawngbawl dan mumal, kawlphetha leh tui supply mumal tak leh skill development lam ngaihtuahsak tum a ni. Smart City hmalakna tura thlanchhuah khawpui 100 zingah Aizawl hi a tel ve a, hmalak hmasakna tur khawpuite hian inelna nei chho zelin tunah hian a tum thumna atan Aizawl chuan he inelna hi a hmachhawn leh dawn a ni.

Sawihona ah hian UD&PA Department aiawh te bakah Aizawl Municipal Corporation, PHE, PWD, P&E, SIPMIU, Health & Family Welfare, Environment & Forests, Transport, LAD, Art & Culture, Disaster Management & Rehabilitation, Tourism, Fire & Emergency Services, Traffic, Information & Communication Technology, Town & Country Planning, Sanitation, Asian Development Bank, World Bank, UNDP, Mizoram State Tobacco Control Society, MZU, ICFAI leh NIT te sawm an ni.