3598/2024-2025

Aizawl, the 18th December, 2024: Vawiin chawhma dar 11:00 khan Pi Baryl Vanneihsangi, Aizawl South-III bialtu MLA chuan Governor Dr. Hari Babu Kambhampati chu Raj Bhavan-ah hmuin Centrally Sponsored Scheme, Social Security Scheme leh pawimawh dangte mipuite'n an chhawr tangkai thei dan tur an sawidun.

Governor Dr. Hari Babu Kambhampati chuan mipuite'n an tana hamthatna awmte an hriat chian lehzuala an chhawr tangkai ngei theih nana tanlak a tul thu a sawi a. Amah ngei pawh MLA leh MP a lo nih tawh thin thu leh mipuite rawngbawl sak chu dah pawimawh bera neih a tul thu a sawi bawk.

Aizawl South-III bialtu MLA Pi Baryl Vanneihsangi chuan Sawrkar laipui kaltlanga mipuite tana hamthatna duante hriat chian zel a duh thu leh mipuite'n an hlawkpui theih nana tanlak a tum thu Governor hi a hrilh a ni.

He hunah hian Social Security Scheme pawimawh tak tak zinga mipuite awlsam taka an inziahluha an chhawr tangkai theih tur, kum tin cheng 436 thawha engvang pawha thihna a thlena life insurance cheng nuai hnih thleng dawn theihna Pradhan Mantri Jeevan Jyoti Bima Yojana (PMJJBY) leh cheng 20 thawha accident laka life insurance cheng nuai hnih thleng dawn theihna Pradhan Mantri Suraksha Bima Yojana (PMSBY) chungchangte, Mudra Scheme, Solar Rooftop Scheme leh Centrally Sponsored Scheme pawimawh dangte leh hemi kawnga hmalak theih dante an sawidun a ni.