3597/2024-2025

Dated Lawngtlai, 18th December 2024: Vawiin chawhma dar 10:30 khan Officers' Club Lawngtlai (OCL) te chuan Mi harsa leh Chanhai zawk ten Krismas hlim taka an hman theih nân a sum an thawhkhawm ' Bahhnukte Charity' cheng 1,23,000 chu Central Young Lai Association (CYLA) Hruaitute  kutah a mamawhte hnena hlan chhawn turin an hlan.

He hunah hian Pu Lalrinsanga (DCSO) President, Officers' Club Lawngtlai  chuan 'Bahhnukte Charity'  puala sum tlingkhawm chu Pu F. Lalrothanga, President, CYLA kutah OCL ai awhin a hlan a. Thu sawi chhunzawm nghalin Pu Lalrinsanga chuan  kum  2017- a  Officers' Club Lawngtlai din a nih atang khan kum tinin  'Bahhnukte Charity'  kalpui thin a ni, a ti a. Lawngtlaia NGO hrang hrang, Motherless Home leh mipuite tan OCL an luanchhuah fo thu tarlangin, hma lam hunah pawh  Lawngtlai mipuite tan theihtawp  chhuah an tum thu a sawi. Pu Lalrinsanga chuan OCL Member kal chhuakta te pawhin 'Bahhnukte Charity'  an ngaihpawimawh thu sawiin, kuminah pawh sum leh pai tha hnem tak an thawh a ni, a ti. CYLA ten chiang zawk a tanpuingaite  an hriat avanga an kut a hlan an nih thu sawiin, Pu Lalrinsanga chuan tha hnem ngai taka a mamawhtute hnena sem chhuak turin CYLA hruaitute a ngen nghal bawk.

Pu F. Lalrothanga, President, Central Young Lai Association (CYLA) chuan thu tawi sawiin, Officers' Club Lawngtlai  leh CYLA-  ten thawhhona tha tak an nei thin a, hei hi chhunzawm zel a pawimawh hle a ti a. Lawngtlai District hmasawnna tura Officers' Club Lawngtlai  hmalakna hrang hrang fakawm a tih thu tarlangin, thahnem ngai tak a thawk zel turin a ngen a. CYLA chu Lawngtlaia Tlawmngai Pawl lian ber a nih angin, Officers' Club Lawngtlai te chuan hmang tangkai thiam se a duh thu a tarlang. Pu F. Lalrothanga  chuan Mi harsa leh chan hai zawkten Krismas leh Kum thar hlim  taka an hmanna turin 'Bahhnukte Charity'  chu YLA Branch kaltlanga  sem a nih tur thu a tarlang a ni.

Vawiin hun hi Central Young Lai Association (CYLA) Office, LADC Complex, Council Vengah hman a ni a. Officers' Club Lawngtlai Office Bearers leh CYLA hrauitute  an tel kim tha hle a, Pu JH Lalrindika, Genral Secretary, CYLA chuan in hmehriattirna hun  neiin, Pu Ricky VL Hmingthanzuala, AGS, CYLA chuan tawngtainain hun a khar.