3596/2024-2025

Dated Aizawl, the 18th December 2024: Vawiin khan CSR Cell te chu an chairman Pu TBC Lalvenchhunga hovin a pisaah an thukhawm a. A hmalak tawhna te thlirletin, hmachhawp an neih te an sawiho.

December ni 10 khan CSR Cell hian I&PR Conference Hall-ah Mizorama CSR fund dil thei registration nei leh neih tum pawl, sawrkar department, agency leh Deputy Commissioner zawng zawng te sawmin awareness campaign a buatsaih a. Kha an thiltih thlirletna kha neiin, ngaihventu an tha tawk nia an hriat avangin an lawm hle.

Awareness nasa zawk kalpui dan tur an ruahman belh a, nakkum lama CSR Conclave lian tham buatsaih dan tur pawh an sawiho.

CSR fund dil thei registration nei society, sawrkar agency leh department te leh CSR Fund pe thin corporate aiawhte inthlun zawmna tur online CSR matchmaking platform an duan mek pawh an peih fel tep tawh thu meetingah hian tarlan a ni.

Tarlan tawh thin angin India ramah CSR Fund tam tham tak hi kumtin a awm reng a. A dil thei leh dil thiam Mizoramah an tlem si avangin Mizoram chu CSR Fund dawng tlem ber state a ni thin. Tam zawka CSR Fund hmuh a nih theih nan sawrkar chuan CM office-ah CSR Cell hi a din a. He cell hian CSR dil thei tura registration neih dan te, registration nei ten awlsam taka an dil theih dan tur zirtir te, proposal siam dan te, CSR pe thei Company te nena an inthlunzawmna tur hmalakna te chak takin a bawhzui mek a. Hemi lama tui leh tihtumte tan CSR Cell hi engtiklai pawha dawr theih reng a ni.