3595/2024-2025

2024 Pawltlak thla ni 18: Vawiin khan Lunglei District Additional Deputy Commissioner Pu James Miahlung hovin a office chamber-ah tun Krismas leh Kumthar vuakveta Lunglei Sobji Bazar panna kawnga lirthei leh mipui kea kalte dipdal zawnga thil zuar inpho an awm loh nana hma lak dan tur sawi ho a ni.

He hunah hian Lunglei Municipal Council (LMC) Secretary, DIPRO, Traffic Police Incharge, Market Checker, Chanmari Local Council leh Market Association ai awh te an tel a. LMC-in Chanmari, Venglai leh Electric Veng huam chhungah local council-in an duh chuan Krismas bazar siam a remtih thu leh hma lakna leh ruahmanna chu local council kutah leh lirthei tlan dan chungchang ruahmanna pawh SP kutah a dah thu ngaihthlak niin, SP thupek ding lai angin DAO office aṭanga Sobji Bazar pan thlakna kawng chu Inrinni bikah chauh zing dar 6 - 11 inkarah lirthei tlan luh phal loh a nih thu leh hun dangah chuan lirthei tlan theiha a awm a ṭul thu ngaihthlak a ni a. Sobji Bazar leh a chhehvela lirthei tlan dan chungchanga SP-in ruahmanna a siam thu ding lai bawhpelh a, lirthei tlanna leh mipui kea kalte dipdal zawnga kawng sira thil zuar inphovin harsatna a thlen theih dan leh mipuite tan a him loh theih dan te, kangmei leh chhiatna dang thlen thulha lirthei tlan luh theih nan kawng zuah a ṭul avangin leh mipui kea kalte pawh him leh awlsam taka an chet vel theih nan phalna neia kawng sira inphote'n thuneitute ruahmanna an zawm a pawimawh thu te tar lan a ni bawk a. Chanmari Local Council lamin kawng tibuai lo tura thil zuarte an inpho theih nan hma lo la se tih niin, thupek ding lai zawm a nih leh nih loh endikin hun remchangah joint inspection kalpui ni se, tih a ni bawk.