3197/2023-2024
29.12.2023: Aizawl SP chuan a hnuai a mi ang hian Kumthar lo thleng tur chungchangah hriattirna thu a chhuah:
"Mizorama kan hunpui Kumthar lo thleng turah hian mipuite kan him nan leh hlim taka hun kan hman theih nan Aizawl District Police te chu zantin tlaivarin khawpui chhung hmun hrang hrangah ngawrh taka duty a ni. Aizawl khawpui chhung hi zone pali (4) ah thenin veng hrang hranga kal kual tur 'team' 18 siam a ni a, zan tin tlaivarin an area chhungah patrolling neih thin a ni. Heng bakah hian Mobile Flying Squad ten bike-a chuangin veng hrang hrang an tlawhkual thin a, chhun lamah pawh Police Station tin staff ten anmahni area theuh ah chhun leh zan patrolling an kalpui reng a ni. Christmas leh kumthar vuakvetah mipuite him taka an bazar theih nan leh harsatna an tawh palh pawha pui thei turin Police Help Desk hmun hnih V. Lalliana point-ah leh Israel Point-ah te siam a ni. Kumhlui thlah zanah hian Aizawl khawpui daifem hmun thenkhat Prison Van nena tlawh tura ruahmanna siam a ni.
"Hunpui laia mipuite kan lo him zawk nan Aizawl District Police-te leh Traffic Unit-te chuan ngawrh zawka hmalak mek a ni. Two-wheeler khalhtute helmet khum tur leh a chuang thei aia tam chuang lo turin kan inchah bakah, lirthei khalhtute kan him zawk nan rui chunga khalh lo turin kan inchah a, hetiang kan awm a nih chuan dan anga hmalak zel a ni ang. Hunpui laia Traffic Police-te hmalaknain dan bawhchhia mi 131 lai man leh chawitir tawh niin, an pawisa chawi tling khawm pawh Rs. 1.26,000/- lai a tling a ni.
"Aizawl District Magistrate-in thupek a chhuah angin mipuite halpuah hal le tur leh silailem, a mu kapchhuak thei te hmang lo turin kan ngen nghal bawk a ni. Halpuah zuarte vai reng an ni a, criminal case pawh engemawzat ziah luh tawh a ni. Halpuah leh a kaihhnawih phalloh zuar emaw hal emaw man an nih chuan dan anga case siamsak zel an nih dawn avangin mipuite sorkar thuchuah zawm turin kan inngen takzet a ni. Khapna thupek bawhchhia kan hmu a nih chuan a hnuaia phone no, kan tarlanah hian hriattir vat turin mipuite kan ngen a, report dawn a awm a nih chuan dan anga hrem an nih theih nan hmalak chhunzawm a ni ang.
Aizawl PS : 8794747291
Bawngkawn PS : 8794747292
Vaivakawn PS : 8794747293
Kulikawn PS : 8794747294
Zonuam OP : 8794747295
"Mipuite kumthar lawmna hlimawm tak kan neih theihna tur a Police, Traffic Police leh tlawmngai duty-te theihtawpa min pui tur leh kan himalaknate min tawiawm turin kan inngen a ni."
