3198/2023-2024

29.12.2023: Vawiin khan Art & Culture Minister Pu C Lalsawivunga chuan Vaphai khuaa Primary Agriculture Credit Coperative Society Ltd (PACS) chu tlawh in, an hmalakna hrang hrangte a enpui.

Art & Culture Minister chuan thu sawiin, Vaphai khuain an khaw hmakhua ngai taka hetiang an ngaihtuah chhuak chu lawmawm a tih thu a sawi a, mipuiten Bank dawr tura khaw thenawma an kal ngai tawh lova mahni khawtual ngei a Society rintlak tak a awm chu lawmawm a ti a. Society din tur hian inrintawnna mai bakah rinawmna a pawimawh thusawiin, "thawktu leh mipui inkarah inrintawnna nghet tak a awm tur a ni" a ti a. Society in hma an lak zelna tur leh an hmachhawpte pawh chak taka bawhzui a nih theih nan a changtu Minister leh official-te hnenah thlen a tum thu a sawi bawk a ni.

Vaphai PACS hi kum 2014 October thlaah Vaphai pa ho mi 40 in bultanin kum 2015 March thlaah registration tih fel a ni a. Society a pawisa dahte hi interest leh fixed deposit te hi RBI rate angin a kal vek a. Tunah hian MAHFED, MIZOFED leh PIGFED te nen thawk hoin kuthnathawktute tan awlsam zawka eizawnna an neih theih nan hmalak a ni. Apex bank nen inzawmin affiliation nghah mek a ni a. Tunah hian an sum thawhchhuah hmangin power supply 100 kva an bun fel tawh a, hman mai theih tura buatsaih mek a ni a, ran chaw siamna khawlte, hriak herna khawl hrang hrangte pawh bun fel tura hmalak mek a ni bawk.

Vaphai PACS ah hian tun dinhmunah depositor 600 chuang awm mekin staff 2, Manager pakhat leh Office Assistant pakhat an awm a ni.