1978/2023-2024

Aizawl, 21st September, 2023 : Nizan khan DIPR Minister Pu Lalruatkima'n Tuikual South YMA Hall-ah Aizawl West-II Assembly Constituency MLA Cup Basketball Tournament a hawng.

Pu Lalruatkima chuan a bialchhunga veng hrang hrang thalaite tana Basketball inelna buatsaih a ni chu lawmawm a tih thu sawiin, tournament huaihawttu te chungah lawmthu a sawi a, a bial chhung chu basketball-ah an hming tha tih sawiin MSL bakah Mizoram aiawha fehchhuak thin player an nei thin chu chhuanawm a tih thu a sawi a. Basketball hmasawnna atana hma la tute fakawm a tih thu sawiin basketball hmasawnna bakah thalaiten hriselna tha zawk an neih a, zuk leh hmuam bakah ruihtheih thil laka an lo fihlim zel theih beiseia hmalak a nih ang ngei a inkhel ve lo tur thalaite pawh an taksa enkawl uluk a, invawng thianghlim turin a chah a ni.

Tuikual South huam chhung Tuikual lui kama Rokunga Volleyball Court leh Ralliana Memorial Basketball court te chu chei tha a mini-sports complex changtlung tak din tum a nih thu a sawi a, hemi atan hian SASCI kaltlangin cheng nuai 120 sanction hmuh a nih tawh thu a sawi a, Tuikual North-a futsal ground pawh artificial turf phah mek a nih thu leh karleh lamah turf dang a rawn thlen nelh dawn a, reiloteah a ground pumpui chu phullem phah chhuah a ni dawn tih a sawi a ni. Tuikual North-a indoor stadium building chu a hlui deuh tawh avangin PMJVK hnuaiah cheng vaibelchhe 16 senga chei that tur a nih thu leh basketball leh volleyball court bakah thil dang tangkai tak tak dah a tihchangtlun a nih tur thu a sawi bawk a ni.

Pu Ruatkima chuan Dinthar vengah basketball court changtlung tak SASCI kaltlangin siam mek a nih thu a sawi a, Aizawl Smart City hnuaiah cheng vaibelchhe 13 man Smart Parking (lirthei dahna) Ebenezer Medical centre bulah sa turin hma lak a nih thu leh a lungphum pawh phum a nih tawh thu a sawi a, hna thawh tan mek a ni a ti a, khualzin veivakte thlenna tur room 3, vantlang inthiarna changtlung tak siam a nih dawn bakah futsal ground siam tel a nih tur thu a sawi bawk a ni. Dawrpui Vengtharah infiamna hmunhma tha zawk nei turin SASCI sum nuai 118 sengin hma lak a nih thu sawiin Kanan vengah basketball siam turin ruahmanna siam a nih thu a sawi bawk a ni.

Aizawl West -II Assembly Constituency MLA Cup Basketball Tournament ah hian category hrang hrang Under-18, Men's open leh 35+ siam a ni a. Aizawl West-II A/C huam chhung atang team 16 an tel a, Tournament hi September ni 21, 2023 ah khelh tan a ni ang a, September ni 29, 2023 zan dar 6:00 atang Final khelh a ni ang.

Aizawl West-II A/C huam chhungah hian veng 6 Tuikual North, Tuikual South, Dinthar, Dawrpui Vengthar, Kanan leh Vaivakawn an awm a, he hunah hian Basketball a Mizoram tihmingthatu Tuikual South Tlangvalte chawimawina hun hman a ni a, Tuikual South GSA in bialtu MLA hi chawimawina thu ziak an hlan a ni.