1977/2023-2024

Aizawl, the 21st September, 2023: Mizoram Sawrkar Environment, Forest & Climate Change (EF&CC) Department hnuaia Champhai Forest Division-a Nature Learning Cenre (NLC) kalpui chhoh mek hnuaia hmalakna pakhat, Nature Learning Tour kaltlanga Sikkim State-a nungchi hrang hrangte enkawlna, humhalhna leh zirchianna hmunte bakah ram leilung hauskana humhalh kawnga hmalaknate zirchiang tura Sikkim-a cham mek Nature Learning Press Study Tour Team, Undivided Champhai District chhunga Mizoram Journalists' Association Member 9 leh Information & Public Relations Department Official mi 3 te chuan vawiin khan Indian Council of Agricultural Research - National Research Centre for Orchids (ICAR-NRCO), Pakyong, Sikkim tlawhin hmalaknate an zirchiang.

Chanchinbumite nena inkawmhona hunah ICAR- National Research Centre for Orchids Director Dr. S.P. Das chuan Nauban chu pangpar ngaihhlut hlawh tak, sumdawnna kawnga pangpar hralh hnem sawm zinga pakhat a nih thu leh ICAR- National Research Centre for Orchids chu thiamna hmanga nauban enkawl leh tih changtlun scientific improvement bakah sumdawnna commercial industry siam kawnga hmalatu pawimawh tak a nih thu a sawi a. A hlutna tipung tura sawngbawl (value added product) leh nauban mang mai loh nana humhalhte chu ICAR-NRCO tum pawimawh tak a nih thu sawiin, kumin chhungin hybrid species 16 tlangzarh hman an tum thu a sawi a. Kum 5 kal ta chhungin training tum 94, mi 2,224 tan an buatsaih thu a sawi a. ICAR- NRCO hmalakna leh hmachhawpte tarlangin, Champhaia Nature Learning Centre, Orchidarium din leh Orchid Based Tourism kalpui kawngah tanpuia thawhdun an inhuam reng thu a sawi bawk.

ICAR-NRCO Pakyong, Sikkim hi October ni 5, 1996 ah din niin ram Acre 19.02 a zauah Nauban zirchianna, humhalhna, tihpun leh sum chang thei tura hmalakna an kalpui a ni. Nauban chi (species) 360 an kawl mek a, heng zinga 70 te hi digital herbarium zawhfel a ni.

Inkawmhona hunah hian ICAR-NRCO Director hi Scientist dang Dr. Dipankar Saha, Dr. L.C De leh Dr. N.S. Kalaivanan te'n an tawiawm a, Nature Learning Press Study Tour Team hi Dr. Lallawmkima, IPRO chuan a ho thung a ni.

Ruahman dan chuan naktuk September ni 22, 2023 hian Nature Learning Press Study Tour Team hian Sikkim Himalayan Zoological Park, GB Pant National Institute of Himalayan Institute (Nature Learning Centre and Orchidarium) leh Fambong Lho Sanctuary-te an tlawh dawn a ni.

Nature Learning Study kaltlanga zin chhuakte hian Sikkim State chhunga Sawrkar laipui leh State Sawrkar hmalak dante an zir a. Mizoram Sawrkar Environment, Forest & Climate Change Department kaltlanga Champhaia Nature Learning Centre, Botanical Garden, Satellite Wildlife Rescue Centre leh Nagar Van kalpui kawnga tulte leh pawimawh nia an hriatte zirchiang tura beisei an ni.