2636/2026-2027

Dated Aizawl the 12th October, 2026 : Vawiin tlai khan Secretariat Conference Hall, MINECO ah Pu Katikithala Srinivas, Secretary, Ministry of Development of North Eastern Region (DoNER) leh a thawhpui senior official ten naktuka Aizawlin a thlen tur North East Bankers’ Conclave 3.0 chungchangah press conference a nei.
Pu Katikithala Srinivas chuan hmarchhak state te chu sumdawng te, entreprenuer te, mahni kea dinga eizawn tum te, leh mipui mimirin bank emaw, a tlukpui an ban phaka a awm theih nan hma an la tih vawiin press conference-ah hian a sawi a. North East Bankers Conclave chu vawithum neih tawh niin a hmasa ber hi Shillong ah nghah a ni a, a vawihnihna December 2024 khan Agartala ah nghah niin kuminah hian Aizawl khawpuiin a dawng ve thung dawn a ni, a ti.
Sawrkar laipui hmalakna sawiin DoNER Secretary chuan Agartala-a conclave neih hnuah hmarchhak state ah bank branch thar 131, ATM 126 leh India Post Payments Bank (IPPB) 247 zet a ding thar a ni, a ti a. September 2026 ah chuan hmarchhak state ah bank branch 6674, ATM 5823 leh IPPB tiamin Business Correspondent outlet 63,461 a awm tawh a ni.
Ministry of Home Affairs chuan kum 2022 khan hmarchhak state chhunga thingtlang khaw 9,479 ah te bank leh a tlukpui financial outlet din tumin hma a la tan a. September 2026 thleng khan heng zinga khaw 6,905 chu tuamchhuak hmanin, 2574 an la hmabak a. An la hmabak khaw 2574 zinga 59 ah bank branch 31 din a ni dawn a; a bak 2515 khuaah te hian IPPB dah tum a ni.
Hmarchhak state te tan bank din theihna dan bithliah chu thlahdul a ni a. India ram hmun dangah Bank din theihna turin khaw pakhatah mi 3000 tal an chen a ngaih laiin, hmarchhak state ah chuan mi 2000 chenna khuaah din phalsak an ni a. Mizoramah hian mihring chen tlemna khaw 6 ah chauh loh chuan bank emaw a tlukpui din vek a ni tawh a. Heng khaw 6 ah te pawh hian IPPB emaw bank correspondent dah tum an ni a. Mizoram khaw 43 ah IPPB dah tum a ni bawk.
Ministry of Development of North Eastern Region (DoNER) leh Department of Financial Services chuan hmarchhak state sawrkarte nen thawkhoin economy hmasawnna an ngaihtuah a. North East Bankers Conclave an buatsaih thin bakah May 2025 ah Rising Northeast Investors Summit neih niin sum tam tak peipung tura ruahmanna siam a ni, tih he press conference ah hian tarlan a ni a. Hmasawnna ruhrel din piahlamah, a mi chengte ei leh bar zawnna tihhmasawn te leh, bank loan hmanga mahni kea ding thei tura mipuiten tan an lak theih nan an ban phaka Bank emaw a tlukpui financial institution din hna an thawk mek a ni.
He North East Bankers’ Conclave 3.0 ah hian bank lian tak tak atangin an hotute leh Ministry atangin senior official te an kalkhawm dawn a. Hmasawnna hna thawhna tura bank loan tha mi lak dan tur kawng ngaihtuahin Mizoram leh hmarchhak state-te credit-deposit (CD) ratio tihpun dan an sawiho dawn a ni.