Vawiin khan Chapchar Kut 2016 lawmna chu ropui takin AR Lammualah neih a ni a. Kumin Chapchar Kut hi Art & Culture Minister Pu R. Romawia chuan thlengin, Home Minister Pu R. Lalzirliana chu Kut Pa a ni bawk. AR Lammuala Chapchar Kut lawmnaah hian Mizoram Legislative Assembly Speaker Pu Hiphei bakah MLA leh Mizoram sawrkara officer thahnem tak an tel a ni.

Kut Thlengtu, Art & Culture Minister Pu R. Romawia chuan thuhma sawiin Mizo ze dik tak tarlanga Chapchar Kut hmang tura mipui kalkhawmte hnenah lawmthu a sawi a. Sawrkar pawhin Chapchar Kut hi a ngai pawimawh takzet tih sawiin ropui taka Chapchar Kut hman chu mipuiten kan bat a ni a ti a, “Pathianin Mizo hnamah min dinin kut ropui tak Chapchar Kut min pe a, chuvangin Chapchar Kut ngaih pawimawh hi hnam ang pawhin kan bat a ni,” a ti bawk.

Kut Pa, Home Minister Pu R. Lalzirliana chuan Chapchar Kut chu kan pi leh pute’n khawtlang inlungrual nan leh inpumkhat nana an hmang thin anga thangtharte pawhin inunauna leh inpumkhatna atana Chapchar Kut hi hman a duh thu a sawi a. Inlungrualna hi kan hnam mamawh ber a nih thu sawiin Minister chuan, “Ram hruaina hnathawktu hrang hrang hruaitute hian inpumkhatna tha tak nen ram hi kan hruai thei dawn lawm ni,” tiin a sawm a. Nationalism chu ram hmasawn nana thil tul tak a nih rualin ei leh bara intodelh hi a pawimawh hmasa zawk a ni, a ti. Mizoram hi zahawm taka a dinchhuah theihna kawng awmchhun chu lungrual leh inpumkhata midangte tanpuina tel lova intodelh hi a ni, a ti bawk. Kut Pa chuan kut hmangtu mipuite chu pipute nun mawi, tlawmngaihna leh aia upate zahna chhawm nung zel tur leh inghirnghona tel lova induhsakna nen Chapchar Kut hmang theuh turin duhsakna a hlan bawk.

Chapchar Kut lawm tura kal mipuite chu Central YMA President Pu Lalbiakzuala chuan lo lawmin, Chapchar Kut chu hlimna, inremna leh induhsakna ni atana hmang turin kalkhawmte a sawm a. Pu Lalbiakzuala chuan Chapchar kut chu Zofate inpumkhatna thlentirtu ni thei se a duh thu sawiin, Zohnathlak hrang hrangte chu, “Tumah inla hrang leh inbawl hrang zawnga khawsa lovin, inngeih leh inlungrual takin I khawsa ang u,” tiin a sawm a. Central YMA President chuan, “Mahni culture hi zahpui chi a ni lova, hnam nunphung tha laite chhawm nung zel turin I inbuatsaih ang u,” tiin kalkhawmte a sawm bawk.

AR Lammuala Chapchar Kut lawmna inkhawm hi Art & Culture Department Secretary in lawmthu sawiin a khar a ni.

Chapchar Kut lawmna AR Lammuala neihah hian Mizo hnam nun leh hnam ziarang tilang thei thil chi hrang hrang mimal leh pawl hrang hrangin an entir a. Chapchar Kut lawmna programme ?an nan Mizo Cultural Organisation-ten Hla do chhamin tlang an tlir a. Central YMA aiawhin College Veng Branch YMA in tanna hla, “Kan Zotlang Ramnuam,” an sak hnuah Aizawl khawpui chhunga YMA Branch 84 atangin mi 1581-ten Cheraw kan an entir bawk. Art & Culture Department buatsaihin Mizo naupang incheina entir a nih bakah PC Girls School-in naupang pawnto dan chi hrang hrang an entir nghal a ni. Central YMA hian Khuangchawi dan leh Chawnglaizawn lam hmuhnawm leh mawi tak an entir a. MUP Heaquarters aiawhin Bungkawn Unit-ten Mizo Pipu zai an entir bakah Govt. Mizo High School naupangten Zorimawi beng ti tlai takin an entir. MHIP General Headquarters-ten Mizo Traditional Costume an pholan bakah mimal leh zaipawlten hla mawi tak takin kalkhawmte an awi a ni.

Chapchar Kut 2016 lawmna hi kawng hrang hrangin kalpui a ni a. Vanapa Hall-ah Art Exhibition leh Photo Exhibition buatsaih a ni a. Assembly Building Annexe-ah Flower Show & Fair buatsaih niin AR Lammual Basketball ground-ah pawh Food Fest leh Handloom Show-te buatsaih a ni bawk.

Chapchar Kut hi Mizote kut ropui ber leh ngaihhlut ber a ni.