Mizote Kut lian leh lawm hlawh ber ‘Chapchar Kut’ chu Mizoram hmun dangte rualin Lunglei-ah pawh Thuamluaia Mual-ah hman a ni a. Kut Pa UD&PA Minister Pu Zodintluanga leh Kut Thlengtu Lunglei DC Pu Abhijit Vijay Chaudhari te pawh Mizo thuama inthuamin Chapchar Kut lawmna hi Lunglei mipuite nen hlim takin an hmang a ni.

Khuallian Pu Zodintluanga chuan Chapchar Kut leh Kut dangte hi Mizo hnam nunphung leh ziarang vawn thatna a nih rualin hnam inpumkhatna leh phuarkhawmtu a nih avangin ngaih pawimawh a hlawh zel a ni, a ti. Khawvela hnam hrang hrangte chuan mahni hnam ziarang leh nunphung bik ngaihsanna chang an hre telh telh a, Mizote pawhin hnamdang chindan tha entawn rualin Mizo nihna (identity) hloh lovin, ‘Mizo changkang’ nih i tum zawk theuh ang u tiin mipui kalkhawmte a chah. Ram dan leh hrai zawm hi khua leh tui thate tihdan a nih angin Mizote pawhin thuawihna leh tumruhna nen Mizo ram leh hnam vul zel thei turin tangrual zel ang u, a ti bawk.

Kut Thlengtu Lunglei DC Pu Abhijit Chaudhari chuan Kut chhimtute zawng zawng lawmin inunauna leh inkawmngeih lehzuala niah i hmang theuh ang tiin a chah a. Hmanlai pi leh puten thingbul lungbul an biak laia Kut ang ni lovin tunlai khawvel mil zawngin kutte hi hlimawm taka hmang tur zawk a ni a, vawiina Mizo mipuite Mizo thuam inthuamin Kut hmang tura rawn pungkhawm hian Kut hi Mizo ta a nihzia a lantir chiang hle a ni, a ti bawk.

Sub Hqrs YMA President Pu R.Lalnunthara chuan Chapchar Kut buatsaihnaa tha leh zung seng zawng zawngte chungah lawmthu a sawi a, Kut hi mi zawng zawng ta a nih angin a lawmnaah pawh tumah sawm ngai lovin a duh apiang tel theih a ni tih a sawi.

Vawiin Lunglei-a Chapchar Kut lawmnaah hian zaithiam engemawzat sawm an nih bakah Mizo hnam lam leh zai entir a nih bakah pawl hrang hrangten special item an rawn nei a. MCO Gen Hqrs Lunglei ten ‘Hlado’ an chham a, 2nd Bn MAP ten Pipe Band Display hmuhnawm tak an nei bakah MJA Lunglei ten ‘Miss Chapchar Kut’ an thlang bawk a ni.