998/2022-2023
Aizawl the 22nd June, 2022 : Vawiin khan SAD Conference Hall MINECO-ah Aizawl District Development Coordination & Monitoring Committee chu an chairman Pu C. Lalrosanga, MP, Lok Sabha leh Co-Chairman Pu K.Vanlalvena, MP, Rajya Sabha hovin an thukhawm a, Aizawl district chhunga Central sawrkar sum hmanga hnathawh hrang hrangte an thlir ho. Meeting-ah hian Aizawl District huamchhunga constituency hrang hrang bialtu MLA te an tel a ni.

Pu C. Lalrosanga chuan Central Scheme hrang hrang Mizoram chhunga hmalak mek dan chhuizuitu monitoring committee pawimawh tak DISHA meeting hi sawrkar laipuiin a ngai pawimawh hle a, kalphung pangngaiah chuan thla thum dan zela neih thin tur a ni a. Amaherawhchu hripui leng avangin hun engemaw chen mumalin kalpui theih a ni lova, Parliament Session leh Mizoram Legislative Assembly Sessin te a karah a lo tlak thin avangin a hun dik takah neih theih a ni ta lo, a ti a. Meeting hmasaa an lo rel tawh, hmalakna tur duan sa te enpuiin December 2021 atanga April 2022 chhunga hmalakna te thlirho a nih tur thu meeting-ah hian a sawi a ni.

Vawiin meeting-ah hian Centrally Sponsored Scheme hrang hrang MGNREGA, PMAY, SABY, WDC, SPMRM, DDU-GKY, DDU-GJY, AMRUT, Swaach Bharat Mission, NRDWP, PMGSY, SAUBHAGYA, PMUY, MDM, NLRMP, PMJDY, PMFBY, NPCDS, NTPC, JSY, JSSK leh a dangte thlirho a ni a. CSS leh sawrkar laipuiin state-te hmalakna tura a ruat programme hrang hrang te an kalpui dan, an thlen chin, an hmalak mekna leh hmachhawp an neih te ngaihthlak a ni a. Heng scheme hrang hrang enkawltu department aiawh ten report an pe a ni. Member kalkhawmten thil pawimawh nia an hriatte sawi zuiin rawtna an neih te ngaihtuahho a ni a. A chhawrtu mipuiin an chhawr tangkai ngei theih nan theihtawp chhuah turin Chairman leh Co-Chairman chuan kalkhawmte an chah a ni.

December 2021 atanga April 2022 chhung hian MGNREGA ah Central atangin sum cheng nuai 6483.37 hmuh a ni a. Aizawl DRDA hnuaia block panga Aibawk, Darlawn, Thingsulthliah leh Tlangnuam block huam chhungah job card 21,059 a awm a, report hun chhung hian hna 2390 (total number of works) an thawk hman a ni. UD&PA hian PMAY-URBAN hnuaiah December 2021-April 2022 chhungin housing unit 57 an siam a, beneficiary mi 8 hnenah loan an pe a. Smart City hnuaiah Reverse vending machine 17 an vuah a, kawngsira tui thianghlim in tur water kiosk 24 siamin Tourist Guidance Centre pali an siam bawk. PHE Department chuan AMRUT (Water Supply) hnuaiah December 2021- April 2022 chhung hian tuikhur 20, retaining wall/fencing, 6, building 5, rainwater harvesting scheme 1 bakah reservoir 7 an siam a ni. PMGSY hnuaiah hemi hun chhung hian PWD chuan Aibawk, Darlawn, Phullen, Thingsulthliah leh Tlangnuam block huam chhungah belhkhawmin kawng 74.67km a thui an sial zo hman. Samagra Siksha, Aizawl District ah Primary School 219 leh Middle School 165 tuam chhuakin zirlai 14324 hnenah uniform grant pekchhuah a ni a, Primary School zirlai te tan a thlawnin text book 9284 a thlawna semchhuah a ni a, Middle School zirlai te tan a thlawnin text book 7424 semchhuah a ni. Mid day meal ah Primary School 230 leh Middle School 195 tuam a ni a, kitchen 16 sak thar a ni.