997/2022-2023
Aizawl the 22nd June, 2022 : Vawiin khan Cooperation Department Minister Pu C.Lalrinsanga chu Mizoram Cooperative Fish Farming Marketing and Processing Federation Limited (ZOFISFED) General Assembly vawi 18-na ah khuallian niin, Hawla Indoor Stadium, Republic Vengah a hmanpui a ni.

Minister Pu C. Lalrinsanga chuan Mizoram chhunga sangha a intodelh piah lamah state danga thawnchhuak thei tura tan lak bakah rinawmna, taimakna leh cooperative society inthurualna a pawimawh a ni, a ti a. ZOFISFED chuan hmasawnna tamtak sangha khawitu te hnenah a thlen avangin, an hmalak tawh te ropui a ti a, hmalam hun atan project lian zawk te ngaihtuah chhuak turin a chah bakah sawrkar pawh ZOFISFED pui turin a inpeih reng a ni, a ti a. Sangha khawi a eizawnna siamtute tan sangha chi tha leh hrisel a pawimawh hmasa ber avangin a chi tha neih theih dan kawng te, storage tha neih dan kawng te zawnga General Assembly thupui chu nunpui zel turin a chah a. ZOFISFED hruaitu leh member zawng zawngte chu anmahni pawl chhunga mimal hlawkna leh therhlo um lo tur leh ram leh mipui hma khua thlira hma la tu an nih in hre reng turin a chah a ni.

Vawiin inkhawm ah hian ZOFISFED Managing Director thar Dr. O.P. Singh pawhin he pawl hmalakna tlangpui leh hmachhawp a tarlang a. Tunkum ZOFISFED General Assembly thupui hi 'In intodelh nan - Cooperative Society kaltlangin Sangha khawi rawh' tih a ni a. General Assembly hi District hmun hrang hrang Siaha, Champhai, Kolasib, Mamit, Serchhip atang te in Society member hrang hrangte an tel a. General Assembly ah Annual Audited Report 2020-21 sawihoa leh Hnahlan Fishery Cooperative Society Ltd.; Bungling Fish Farming C/S Ltd. hnen atangin Report ngaihthlak a ni a, bye laws amendment tur en ho bakah Aizawl khawpui chhunga Sangha zawrh leh lakluh chungchangah ZOFISFED Ltd. in a theih anga hma a lak dantur te sawiho na hun an nei a ni.

ZOFISFED hi October ni 29, 1998 khan din a ni a, kum 2019-20 thleng khan Affiliated Primary Fishery Cooperative Society sawmli pathum an awm a. ZOFISFED hian Fish Seed Farm, Fisheries Marketing Programme, Two Wheeler Mobile Fish Retail Marketing, Fish Feed Production leh a dangte a enkawlin sangha hmanga intodelh leh eizawnna siamsak bakah tihhmasawn chu a tum ber a ni.