2987/2024-2025

Dated Aizawl, the 14 November, 2024: Vawiin chawhma dar 10:00 khan North Eastern Council (NEC) bultumin Entertainment Society of Mizoram (ESM) chuan I&PR Auditorium, Treasury Square, Aizawlah Film-Fest 2024 a buatsaih a. He hun hi Pi Mina Zoliani Joute, Joint Director, I&PR Department chuan khuallian ni a hmanpuiin Film-Fest 2024 a hawng a ni.

Khuallian Pi Mina Zoliani Joute chuan Film-Fest 2024 buatsaihtu ESM te hmalakna chhuanawm a tih thu a sawi a. Film leh Visual Art lamin hma a sawn theih nan Sawrkarin theihtawp chhuah zel a tum tih sawiin, Film industry hmasawnna chu hmuh theih khawpin a thang tih a sawi a. Nodal Department a nih angin I&PR Department chuan inkaihhruaina leh a tihhmasawn dan tur chungchang pawh theihtawp chhuaha a buaipui zel dawn thu sawiin, Children Film Festival hmasa ber kum 2006 a buatsaih atanga thlirleta vawiin thlenga hmasawnna nasa tak hmuh leh hriat a ni ta chu lawmawm a tih takzet thu a sawi a. Mahni zawn theuha thiamna (talent) neihte tihpun chu hmasawn zel nana thil pawimawh tak a nih thu a sawi bawk.

Hun hman hi Pu Lalhruaitluanga Ralte, Vice Chairman, Entertainment Society of Mizoram (ESM) chuan kaihruaiin, Film-Fest pual hian Pu Andrew Lalchhandama (DDK) kaihhruaiin 'Mizo Film Industry dinhmun leh hmathlir’ tih thupui hmangin I&PR, MFF, MFDS, MZU Mass Communication, Lersia App, Leitlang Pictures, In-House Production leh Conflate Video Production aiawh te'n thupui sawihona bakah zawhna leh chhanna hun (talkshow and interaction) an hmang nghal a. Pu B. Lallawmkima, Chairman, ESM chuan lawmthu sawiin hun hman hi a khar a ni.

Vawiina FIlm-Fest 2024 neihah hian Film Industry leh hemi lama tui mi thahnem tak telin, Mizoram University-a Mass Communication Department hotute leh an zirlai thenkhatte bakah, Mizoram-a Film siam lama mi hlawhtling tak takte, I&PR Department hotute bakah Mizorama Film Industry-a sulsutu pawimawh tak takte an tel kim thawkhat hle a ni.