1481/2023-2024

Aizawl, the 14th August, 2023: India ram zalenna Ni, Independence Day 2023 lawmna kal zela In tina hnam puanzar zar beihpui 'Har Ghar Tiranga' kalpui mek leh India ramin zalenna a hmuh atanga kum 75 a tlin lawmna, Azadi Ka Amrit Mohatsav (AKAM) hmawr bawkna atana ruahman, Meri Maati Mera Desh Campaign pualin vawiin chawhma dar 10:30 khan Aizawlah Har Ghar Tiranga Rally buatsaih a ni. Har Ghar Tiranga Rally-a telte hi Aizawl District Bawrhsap Pi Nazuk Kumar IAS chuan DC Office tual atangin a vailiam a, kawngzawh hi MINECO thleng neih a ni.

A kharna hun MINECO a buatsaihah he hun telpuitu Aizawl District Bawrhsap Pi Nazuk Kumar, IAS chuan Har Ghar Tiranga Rally leh Meri Maati Mera Desh Campaign-a tel zirlai leh Sawrkar hnathawkte chu zalenna neih hlut zia hre thar leh tura chahin, zalenna hnuaiah hmasawnna leh hamthatna hrang hrang kan nei a, a ngaihlutu leh chhawr tangkaitu nih kan tum theuh tur a ni, a ti. Kalkhawmte chu kan ramin zalenna a neih theih nana tha thawhtute inpekna theihnghilh lova chhawmnun tum zel zawk turin a sawm nghal bawk.

He hunah hian Har Ghar Tiranga Rally-a tel te'n ram tana inpekna tithar leh tur a thutiam (Panch Pran Pledge) an la a; kum 2047 hma ngeia India ram hi ram hmasawn leh intodelh a siam turte, Sala kun thinna rilru paih bo vek tur te, Ram leh hnam ziarang hausaknate chawisang tur te, Inpumkhatna tichak tur leh ram venghimtute zahna lantir zel turte leh khua leh tuite mawhphurhna hlen chhuak zel turtein thutiam an la a ni.

Independence Day 2023 lawmna puala Har Ghar Tiranga beihpui neih mekah August ni 13-15 chhungin In tinah India hnam puanzar zar beihpui thlak a ni a. Sawrkar laipui chuan Har Ghar Tiranga Campaign ngaipawimawha tel theuh turin mipuite a sawm a ni.