1482/2023-2024

Kolasib dated 14th August 2023: Vawiin khan Kolasib DC Office tualzawlah India zalenna vawi 75-na lawmna ‘Azadi ka Amrit Mahotsav’ hmawrbawkna ‘Meri Maati Mera Desh’ pual a hun hmanna neih a ni a. Pu John LT Sanga, Deputy Commissioner chuan ram puanzar pawt pharhin Marter-te huan, ‘Amrit Vatika’ siamna tur a Kolasib district chhung khaw hrang hrang atang a lei lakte chu chhunkhawm a ni.

Pu John LT Sanga, Deputy Commissioner chuan India ram chu khawvel a ram ropui leh hausa hmasa, mi thiam leh mi huaisen tak tak lo chhuah tawhna ram a nih thu te, hnam ziarang leh tawng hrang hrang hmangte hmun khat a an khawsak hona ram a nih thu a sawi a. Hengte hi ram hmangaihtu, mi huaisen tak takte inpekna avanga awhbehna lak ata zalenna min sual chhuah saktute vang a nih thu a sawi. Zalenna hlut thiam a pawimawh thu leh zalenna kan neih mek hi tangkai tak a hmang turin DC chuan kalkhawmte a chah a, ram leilung mi kan nih angin ‘Meri Maati Mera Desh’ hnuai a hmalakna kaltlang hian inpumkhatna leh inlungrualna tha siamtu ni zel turin a fuih bawk a ni. Pu John LT Sanga chuan naktuk mai a Independence Day lo thleng tur urlawk nana ‘Har Ghar Tiranga’ kalpui mek a nih thu sawiin India ramin zalenna a hmuh ni chhinchhiah nan in tin ah ram puanzar zar theuh turin Kolasib mipuite a chah bawk a ni.

Pu Lalmuan Puia, Project Director, DRDO chuan ‘Meri Maati Mera Desh Campaign’ chungchang sawi zauna hun hmangin he campaign hian martar-te pual a lungphum, ‘Shilaphalakam’ siam te, ram tan a inpekna tithar leh tur a thutiam lak te, khaw tin a thingtiak 75 phun te leh khaw tin atanga lei lak khawm hmang a Karavya Path hmun a Martar-te Huan,’Amrit Vatika’ siam te a ken tel thu a tarlang a. Heng ruahmanna hrang hrangte hi August ni 9 atanga ni 30 chhung a kalpui hman tur a rel a nih thu a sawi bawk a ni.

Maj. Carolyne Z Pachuau (Rtd) in vawiin hun hi kaihruaiin ram tan a khua leh tui rinawm ni tur a thutiam lakna hun neih a ni a. Thingdawl leh Bilkhawthlir BDO atangin Kolasib district chhung khaw hrang hrang atanga lei lak te chhunkhawm niin Kolasib district atanga ram tan a nunna hlan Sep. Ngamsiamliana, Nk. Pachhunga leh Lnk. Suren Gurung te sunna hun neih a ni. Divisional Forest Office, Kolasib ruahmanna in thing tiak phunna hun kalpui a ni a, Pi Melody Ngurthantluangi, Addl. DC chuan lawmthu sawina hun a hmang bawk a ni. Kolasib district-a ‘Meri Maati Mera Desh’ program hmanna ah hian District Office, tlawmngai pawl leh khawtlang hruaitute bak ah zirlai naupangte an tel a ni.

Independence Day lawmna urlawk nana ‘Har Ghar Tiranga’ pualin ram puanzar tar chungin ‘Two Wheeler Rally’ neih nghal a ni a. Pu John LT Sanga, Deputy Commissioner hian rally hi telpuiin Kolasib khaw chhung hmun laili lai fan kual a ni a. Sawrkar hnathawkte leh a remchang apiangte rally-ah hian an tel bawk a ni.