918/2023-2024

Aizawl, 26th June, 2023 : Vawiin hi United Nations hriatpuia khawvel pum huap ruihhlo dona ni "International Day Against Drug Abuse and Illicit Trafficking" vawi 34-na a ni a. Hemi denchhen hian Aizawl District Police buatsaihin tukin khan Millennium Centre, Dawrpui atanga Aizawl SP Office, Treasury Square thleng kawngzawh ( rally/walkathon) a ni. He hunah hian Modern English School naupangte leh Aizawl DEF hnuaia thawkte bakah Aizawl Traffic Police te an tel a ni.

Kawng zawh tanna Millenium Centre tualzawlah hun tawi hman niin, kawngzawh vailiamtu Pu Lallianmawia, DIG (Northern Range) chuan kalkhawmte hmaah ruihhlo pun chak zia sawiin, tunhma chuan hawng khat vel ang lek lek kan man thin a, tunah chuan a kg zawngin kan man fo ta mai hi a lungchhiatthlak takzet a ni, a ti a.

Ruihhlo zuar ten thalaite, a bik takin lehkha zirlai la naupang tak takte an bitum thin tih sawiin, tunhnaiah ruihhlo zawrhna man a tlahniam a, heihi a zuartute sumdawn tumna a ni a, man tlawm zawka an zawrh hnuah damdawi ngai thar an tam veleh a man an tisang leh ngei ngei dawn a, chu chuan rukruk leh pawikhawihna tam tak a hring chhuak dawn a ni a ti a. An zirchiannaah ruihhlo ngai zinga a tam ber hi an thianten an tih vanga tih ve chhin chak an ni a, chuvangin tih ve chhin loh hrim hrim kha a him ber tih sawiin, ruihhlo laka an in thiarfihlim ringawt pawh hian ram leh khawtlang tan nasa takin hna an thawk nghal a ni a ti.

Kawngzawh tawpna Aizawl SP office tuala inkhawm buatsaih hi Aizawl district bawrhsap Dr Lalhriatzuali Ralte chuan hmanpuiin zirlaite chu ruihhlo laka an fihlim a pawimawh thu a sawi a. Zirlaite chu naktuk lawka kan ram hruaitu turte an nih avangin an mawhphurhna a sang a, ruihhlo vanga kan ram tluchhe mai thei dinhmuna ding hi a veng theitu pawimawh ber te zinga mi an ni tih sawiin Mizoram leh mizo hnam tan ruihhlo do kawngah theihtawp chhuah turin a sawm a, ruihhlo ti emaw zuar emaw an hriat chuan sawrkar hnenah report thuai zel turin a chah bawk a ni.

Aizawl SP Pu Rex Zarzoliana Vanchhawng chuan he hun buatsaih a nih chhan a sawifiah a, ruihhlo in mizo thalaite a run nasat thu sawiin tihtakzeta kan do a ngai tawh a ni a ti a, zirlaite chu ruihhlo laka an fihlim bakah midangte fihlim tura zirtir chhawngtu (ambassador) an ni thei tiin a fuih a ni.

Kawngzawh kharna inkhawmah hian ruihhlo do kawnga thawk tha mi pathum chawimawi an ni a. Inspector Dhian Singh Minhas, O/C, Vaivakawn P/S,  SI J. Lalchungnunga, O/C, Sairang P/S leh SI T. Thuamchungnunga, DSB, Aizawl DEF te hnenah hian chawimawina thuziak (citation) Aizawl bawrhsapin a hlan a ni.