919/2023-2024

Mamit 26th June, 2023 : Vawiin khan Chhimveng YMA Hall, Mamit-ah District Level Narco Coordination Centre, Mamit District buatsaihin International Day Against Drug Abuse and Illicit Trafficking chu Pu VL Remliana, Chairman District NCORD/ District Bawrhsap ni bawk hova hman a ni.

Chairman NCORD chuan khawvel hmundangte ruala ruihhlo dona ni hman a nih theih nana hmalatu NCORD members puite chungah lawmthu sawiin ruihhlo that lohzia leh a nghawng pawizia hre tura zirlai kalkhawmte chu an thusawi ngaihthlakte theihnghilh nghal mai lova, an puitlin hnu thlenga an nun zawng zawng tichhe vek thei ruihhlo chu do tlat turin a chah a, zirtirna hmun khat dawng theuhte a tlakna leilung a zira hlawkpui leh tangkaipui kan awm dawn thu sawiin, Sawrkar Department, NGO hrang hrang te'n uar taka a dona kawnga hma an la chunga tilui tlattu ni lo turin zirlai naupangte chu a chah a ni.

District Bawrhsap chuan kan hun kaltawha ruihhlo leh a kaihnawihin kan ram leh hnam a tihchhiat tawhna chu tuna thangthar, nakin lawka kan ram hmel tidanglam theitute-ah hian a innghat a ni tih kan hriat a, thiltha kan hriat leh thilthalo kan hmuhte chu kan nunah a seng luh dan thiam turin zirlaite a fuih a ni.

He hunah hian Pu Lalsangzuala Ralte, Asst.Commissioner, Excise & Narcotics, Mamit chuan ruihhlo dona kawnga hmalakna kawng hrang hrangte leh kan ram leh hnam tichhetu ruihhlo do tura kalkhawmte sawmna thu sawiin, Dr. C. Lalramdina, State Quality Consultant, MHSSP, Health & Family Welfare chuan ruihhlo leh a kaihnawih kalkawng, a inven dan leh taksa-a nghawng thalo tak a lo neih dante bakah chhunglam leh pawnlama min beih dan a lem nen zirtirna a nei bawk a ni.

Vawiin ruihhlo dona ni hmanna hun hi Pi Lalthangpuii Pulamte, Convener, District NCORD/ SP Mamit chuan a kaihruai a, International Day Against Drug Abuse and Illicit Trafficking Puala New Diamond School-a Drawing Competition neiha lawmman 1. Mary C. Lalrinpuii Cl- IX, 2. Lalbiakchungnungi Cl - IX, 3. Alan Lalrempuia Cl -X te hnenah lawmman khuallian hian a hlan nghal a ni.

He hunah hian NCORD members te leh Mamit khawpui chhunga zirlai thlanbikte an tel a ni.

Ruihhlo dona ni pual hian Mamit District chhunga ruihhlo man khawm Heroin 1.320 kg, tablets 660, local market-a Cheng Nuai 28,35,260/- man hu halralna District Hospital-a Incinerator-ah neih zui nghal a ni.

Tukin khan Mamit Field veng atanga Charkawn thleng Ruihhlo dona kawng zawh Pi Lalthangpuii Pulamte, SP Mamit hovin neih a lo ni tawh bawk.