920/2023-2024

Dated Serchhip, the 26th June, 2023: Serchhip Field Veng Village Council-a Seat ruak pakhat, General Seat hnawhkhahna tura bye-election neih tur inbuatsaihna atan vawiin khan Field Veng VC Draft Roll chu tarchhuah niin hming thun thar, paih leh siamthat ngai te tan June 27, 2023 atanga July 11, 2023 thlengin dilna thehluh theih a ni ang.

Field Veng Village Council Draft Roll hi Pu James Lalnithanga, Addl. DC leh Asst. DEO chuan vawiin khan Serchhip DC Meeting Hall-ah tlangzarhin State Election Commission atanga lehkha an hmuh angin Draft Electoral Roll hi tarchhuah a nih thu a sawi a, VC inthlanna leh MLA/MP inthlanna a Electoral Roll te chu a hrang tih sawiin, hei hi mipuite pawhin an hriat a tul thu leh VC inthlanna neihna tur huamchhunga mipuite pawhin an ngaihven a pawimawh thu a sawi a. Draft Electoral Roll chu Electoral Registration Officer (ERO) 26-Serchhip (ST) AC, Assistant Electoral Registration Officer (AERO) 26-Serchhip (ST) AC leh Village Level Officer (VLO) te leh DC Office (Election Branch) ah te entheih a nih thu a sawi bawk.

He hunah hian Serchhip Pu Lalrinsanga Hnamte, Election Officer chuan Serchhip Field Veng VC tana Draft Electoral Roll dinhmun tarlangin, Vote nei mipa 381 leh hmeichhia 449, an vaiin Vote nei mi 830 an awm thu a sawi a. Kumin July 1-a kum 18 tling chin te tan hming thun belh theih a nih dawn bakah hming paih leh siamthat ngai te tan Form 3, 4 leh 5 hmanga dil tur a ni a. Dilna hi Serchhip – V (Filed Veng) VLO hnen atangin lakchhuah theih a ni ang a, June 27, 2023 atanga July 11, 2023 thleng dilna thehluh theih a nih thu leh heng dilna te hi July 11-17, 2023 chhunga chingfelin July 18, 2023-ah Final Electoral Roll tarchhuah a nih dawn thu a sawi a. Tun tuma Draft Electoral Roll atan hian MLA/MP Electoral Roll chu hman a nih thu leh VC Electoral Roll-ah hian Non-Tribal, Mizoram chhung mi ni lo te paih tur an nih thu leh a VC Area a awm nghet te thun belh theih an nih thu a sawi bawk.

Vawiin a Serchhip Field Veng Draft Electoral Roll tarchhuah tak hi Asst. DEO chuan Political Party leh YMA te hnenah a copy pein mipuite tan en theih a ni dawn a ni.