2308/2024-2025

Aizawl, September 30, 2024: NEDFi, North Eastern Council (NEC) leh Ministry of Development of North Eastern Region (DoNER) te tangkawp buatsaihin vawiin khan Aijal Club, Aizawl-ah NEC Vision 2047 chungchang ngaihtuahin State Level Consultative Committee an thukhawm.

He huna thu a sawinnaah Planning & Programme Implementation Department Additional Secretary Pi Irene Zohlimpuii Chongthu chuan NEC Vision 2047 thil tumte tihhlawhtling turin sorkar, private sector, khawtlang leh stakeholder dang zawng zawngte tanrual a ngaih dawn thu a sawi a. Entrepreneurship tihhmasawn nana inkaihhruaina zamte ngaihtuah nawn leh a tul thu sawiin, Myanmar leh Bangladesh nena ramri kaltlanga insumdawntawnna kawngah Mizoramin dinhmun pawimawh tak a chan thu a sawi a. Thalaite entertainment sector, a bik takin film leh music lamah thuk zawka an luh chhoh mek zel thu a sawi bawk.

NEC Senior Economic Adviser Pi Sherry Lalthangzo chuan thil tam tham zawk hmun danga thawn chhuak tura tanlak a tul thu leh vawksa leh thil dangte siam chhuah tihpun a tul thu sawiin, Matabari Deep Sea Port chhawr tangkai theih dan tur chungchang a sawi bawk a. NIPER kaltlanga chi thlai chi hrang hrang siamchhuah tuma hmalak mek a ni tih sawiin, NEC chuan loneitute leh ei leh in siamna sector-te tana marketing pui turin NE RACE platform a tlangzarh tih a sawi a. DoNER-in investment ti theite hip tumin investment summit a buatsaih dawn thu a sawi bawk.

NEDFi Executive Director Pu S.K. Baruah chuan Vision 2047 document siam turin mithiam 34 leh core member 4 awmna committee-in Sawrkar laipui leh State-te rawn chunga hma an lak mek thu a sawi a. Ruahmanna siam kawngah thawhhona tha a pawimawh thu sawiin, kalkhawmte chu an ngaihdante thawh theuh turin a sawm a ni. 

Drafting Committee-a core committee member, Prof. K.M. Bujarbaruah chuan NEC Vision Plan 2047 chungchang chipchiar takin a sawifiah a. Mizoram sawrkarin ngaihdan a thawhte pawh a sawilang bawk a. Sawihona hun hman zui niin, sorkar department, zirna in, bank, sumdawng, entrepreneur leh civil society organization-te he hunah hian an tel a ni. 

Hemi hnu hian tlaiah NEDFi team-te hian Chief Minister chu hmuin vision document chungchang an hrilhfiaha, draft copy an hlan nghal a ni.

Attachment

  • Loading attachment...