2991/2024-2025

Aizawl dated 14th November 2024: Vawiin chawhma khan  All India Cooperative Week vawi 71-na lawmna   hun chu Lianchhiari Rûn, Treasury Square, Aizawl ah hman a ni a. Week lawmna inkhawm hi Pu R.Lalremsanga, Registrar, Cooperative Societies-in kaihruaiin Pu PC.Vanlalruata, Minister, Cooperation Deaprtment chu khuallian a ni.

Lawmna inkhawmah hian Cooperation Department Minister chuan kumin 2024-a All India Cooperative Week thupui 'Role of Cooperatives in Building Viksit Bharat' tih chu thupui pawimawh tak a nih thu sawiin India ram chu hmasawnna kawng a ṭhang duang tak a nih thu leh chumi rual a hmasawn ve tum a hnathawh a pawimawh thu a sawi a. India ram chu kum 2047 ah hian Developed Country dinhmun ni turin chak takin ke a pen mek thu leh hemi tihlawhtling tur hian a huho a Cooperative Society ang a hmalak a pawimawh thu a sawi bawk a ni.

Mizoram sawrkar chuan kuthnathawk a ei zawngtute leh thiamna leh theihna nei, mi harsate khaichhuahna turin Hand-Holding Policy a kalpui ṭan mek thu khuallian chuan tarlangin, khaw 800 ah Primary Agricultural Credit Society (PACS) din a nih tawh, tih a sawi a. Hengte hian ṭha tak a hna an thawh theihna turin Cooperation Department leh Federation zawng zawngte tanrualna leh vilpuina a pawimawh tur thu a sawi a. Kuthnathawktu chu Cooperative Society a thawh hlawk berte zing ami an nih thu a tarlang bawk a ni.