Vawiin khan Mizoram hmun hrang hranga thlalatu pawl member te chu All Mizoram Photographers Meet vawi-1 na neiin I & PR Auditorium ah hun an hmang a, he hun hi Pi Lallianpuii Director, Information & Public Relations Department leh Pi K. Vanlalsangi, Deputy Director leh Nodal Officer, Visual Arts ten an hmanpui a ni.

Pi Lallianpuii chuan khawvel changkang leh hun in her chho mekah thlalak hlutna leh pawimawhna a sang zel tiin thlalak te hi Sawrkar, pawl leh mimal tan pawh document pawimawh tak a ni tawh a, chuvangin a tel lo chuan kan tunlai khawvel hi a kal thei tawh lo a ni, a ti a. Mizo photographer te kutchhuak chu hnam dangte kutchhuak tehkhinin a zahpuiawm loh tiin Department chuan Mizo photographer te tan a theih ang angin an thiamna tihpun leh an talent phochhuah kawngah theihtawp chhuaha tan an lak mek zel thu a sawi a. Mizoram Calendar ah Mizo photographer te kutchhuak hmuh tur a awm hian in hnathawh leh inthawhhlawkna te a tarlang a ni tiin photography ah zir tur leh technique a tam thu te sawiin, mahnia chona siama an thiamna tipung zel turin a chah a ni.

Pi Vanlalsangi chuan photographer te kutchhuak pholanna kawngah leh an tana program hrang hrang kaltlanga Department hma lakna te tarlangin Photographer pawl, a bik takin Mizo Photographers’ Society ten nen thawhhona tha tak an neihnaah lawmthu a sawi a ni.

Meet hi MPS President Pu Tlauliana’n a kaihruia a, Aizawl leh Mizoram khaw dang atangin photographer kal te Mizorama photography hmasawnna tur kawng hrang hrang an sawi ho a ni.