Entrepreneurship Development Centre (EDC) Mizoram leh Govt Lawngtlai College tang kawpin ni hnih awh District Innovative Challenge on Business Solution to Sustainable Development Goals an buatsaih chu vawiin khan Govt Lawngtlai College Auditorium-ah hawn a ni.

He EDC Innovative Challenge hawnna inkhawm hi Govt Lawngtlai College Principal Pu T. Thangthuama'n a kaihruai a. Innovative Challenge an buatsaih chu a tel zawng zawngte'n hlawkpui tum theuh turin a fuih a. Entrepreneurship Development Scheme (EDS) Project Coordinator Pu Lalrinnunga chuan he Challenge awmzia hi sawi fiahin, ram hma sawnna lam vei tura thalaite rilru a tha zawnga hruai leh mahni kutkawih ngeia ding chhuak tura thalaite fuih chu Innovative Challenge-in a tum bulpui ber a ni, a ti a. Planning & Programme Implementation Department-a Research Officer Pu Laldinthara Ralte chuan hawnna thu sawiin, thalaite chu rilru chak tak, an duh tihlawhtling tura theihna sang tak nei an nih avangin inelna neih chhung rei lo teah pawh khawtlang harsatna sut kianna tur leh ram hma sawnna tur ni si, sumdawnna hma thar lakna tur ngaih dan tha tak tak an ngaihtuah chhuah theih a rin thu a sawi a. Tih tak zeta an ngaihtuahna seng turin a telte chu a chah.

He Innovative Challenge-ah hian a ni khatnaah hma sawnna ngelnghet leh rualkhai nei tura hmathlir (Sustainable Development Goal) hnuaia goal 17 awm chhunga harsatnate behchhanin a telte'n harsatna an ngaih pawimawh zawng minit 3 chhung an sawi theihna hun hawn a ni a. Endiktu (judge)-te'n chu'ng zinga harsatna (problem) tlinga an hriat thlang chhuakin, problem neitute chu team leader an ni nghal a. Team leader-te hnuaiah hian a tel zawng zawng chu team hrang hrangah inthen darhin, an team leader-in harsatna a chhawp chhuah chu ching fel tura mimalin sumdawnnaa an chantir theih dan an sawi ho leh ang a. A chin fel dan tur an ruahman chu ni hnihnaah minit 10 chhung judge-te hmaah sawi fiah lehin, chumi atang chuan result siam a ni ang.

He Innovative Challenge-ah hian a ti tha ber team-in Rs 30,000/- dawngin, pahnihnain Rs 20,000/- leh pathumnain Rs 10,000/- an dawng dawn a. A tel zawng zawngin participation certificate leh Rs 500/- an dawng theuh bawk ang.

Entrepreneurship Development Centre hi Mizoram sawrkar Planning and Programme Implementation Department ruahmanna, Entrepreneurship Development Scheme hnuaia awm niin, Mizoramin entrepreneurship lama hma a sawn theih nana hma latu a ni a. Tun tumah hian district zawng zawng tuam chhuakin district-a college-te nen tang kawpin he Innovative Challenge hi an buatsaih a. Zirlaite kawng kawhhmuhin, notebook, t-shirt leh pen te a thlawnin an sem bawk.