Lunglei DCSO hnuaia Retailer 236 ten buhfai sem nana an hman tur khawl thar ePOS device (Electronic Point of Sale) hman dan inzirtirna Art & Culture Auditorium/ Heritage Centre ah February ni 13 leh 14 ah neih tur ani a. A ni khat ni (February ni 13) hian Supply Centre 7 Lunglei (Luangmual) centre, Haulawng, S. Vanlaiphai, Hnahthial, Tawipui, Tarpho, Mualthuam Centre  hnuaia Retailer 123 te training pek an ni. ePOS device training hi Visiontek company lama mithiam ten an pe a ni.

ePOS device training inkhawm hi Pu Biakthansanga, Inpector, DCSO, Office, Lungleiin kaihruaiin Pi Carolyn LB Khiangte, DCSO chuan Sorkar laipui ruahmanna anga ram puma kalpui mek Retailer-te hman tur digital bukna leh e-POS Machine (Electronic Point of Sale) chu kan state-ah pawh hman tan tur a lo ni ta chu a lawmawmin, lang tlang sawrkar leh mipui rin ngam sawrkar kan neih na tur leh, hamthatna dawng tur ten an dawn ngeina tura ruahmanna thar a nih thu a sawi a.  Lunglei District-ah chuan centre 15 zingah centre 11 laiin February quota an lo sem hman tawh avangin a rual tlanga March thla 2020 quota sem atanga hman tan tur a nih thu a sawi bawk. ePOS device khawl hman dan tur hi thiam taka zir theuh turin retailer te a chah ani.  ePOS khawl leh bukna khawl (digital weighing scale) te hi Retailer-te hnenah sem nghal a ni.

Retailer kalkhawm te'n chiang zawka an hriatthiam theihna turin a takin khawl hmanga tihchinna neih a ni a. ePOS (Electronic Point of Sale) khawl hi Bio-Metric khawl niin, retailer ten Buhfai an sem dawn in Ration Card a member tupawh Aadhar Card link te chuan an kut zungpui thla (finger print) lain Retailer hnenah ration an la thei dawn a ni. He khawl hi online a hman tur a nih rualin, Internet awm lohna ah pawh Off-line mode in a hman theih bawk a internet awmna hmunah data upload/download ve leh mai tur a ni.

Naktuk ni 14 ah hian Supply Centre 8, Tlabung ,Tuichawng, Sangau, Barapansury, Lungsen, Putlungasih, Chawngte leh Lungtian hnuaia retailer 113 te training pek leh an ni ang.