146/2024-2025 

Champhai, the 10th April, 2024: Indian Ambassador to Myanmar mawhphurhna chelh tura ruat, Ambassador-Designate to Myanmar Pu Abhay Thakur, IFS chuan zankhat riaka Champhai tlawh turin zanin dar 8:00 khan Circuit House, Champhai a thleng. District Bawrhsap Pu James Lalrinchhana, SP Pu Vineet Kumar leh Official dangte'n an lo dawngsawng a ni.

Pu Abhay Thakur hian vawiin chawhnu khan Mizoram lo thlengin Champhai a pan ding nghal a. Ruahman dan chuan naktuk zing dar 9:00 hian Circuit House Conference Hall-ah District Official, NGO leh ramri behchhana sumdawngte meeting a neihpui dawn a. Meeting zawh hian Zokhawthar tlawhin ramri kaltlanga insumdawntawnna leh hemi kawnga hmalaknate a enfiah dawn a. Hemi hnu hian chawhnu lamah Aizawl panin a let leh dawn a ni.

Ambassador-Designate to Myanmar Pu Abhay Thakur hi Pu Thomas Zodingliana, DIG (Eastern Range), Pu Lalthiamsanga Sailo, Jt. Secretary  (Home), Pu K. Laltlawmlova, State Protocol Officer, Pu Ronald Lalchhuanawma, Dy. Director, Commerce & Industries (Commerce) Department & Nodal Officer, Border Trade leh Official dangte'n an tawiawm a ni.