4532/2023-2024

Kolasib dated 11th April, 2024: Nimin zan khan Parish Hall, Venglai, Kolasibah Pu John LT Sanga, Deputy Commissioner chuan ni 3 awh tur, team 42 telna,' Enna In Futsal Tournament' a pet hawng a. Maj. Carolyne Zonunmawii Pachuau chuan he hun hi kaihruaiin Team hrang hranga inkhel turte inhmelhriattirna hun neih nghal a ni.

Khuallian Pu John LT Sanga, Deputy Commissioner chuan infiamna chu taksa hrisel tur a vawnna hmanraw tangkai tak a nih thu sawiin Enna In Boys Home-a naupang awmte tan a luanchhuahna remchang ni pah fawm a Futsal tournament buatsaih a ni chu lawmawm a tih thu a sawi a. He tournament hmang hian inkhelh lam a tui mi te thiamna pho chhuahna hun tangkai leh an thiamna intuaihriam lehzualna hun a hmang turin kalkhawmte a chah a. Ruihhlo lak a fihlim turin leh chhungkua leh khawtlang tan a mi tangkai ni tur a nunkawng tha zawh tlat tur a fuihin midangte tan a malsawmna thlentu leh midangte malsawmna leh duhsakna dawng tlak nun nei turin a chah bawk a ni.

Kolasib district Deputy Commissioner chuan April ni 19-a Lok Sabha MP inthlanna neih tur ah hian kum 18 tling tawh te chuan kan aiawh thlan chhuahna ah vote thlak theuh turin kalkhawmte a chah a, khawvel a mipui tamna ber leh mipui rorelna (Democracy) ram lian ber a vote thlak thei nih hlut zia hre thar theuh turin a fuih bawk a ni.

Capt. Joseph Rozamliana, Superintendent, Enna In Boys Home chuan report pein naupang enkawl lai 18 an awm thu te, Bible chhiar chhuak theuh tur a hma an lak dan te, Home an chhuahsan hnu pawh a nun kawng dik an zawh zel theih nana an inkaihhruai dan te a tarlang a. Enna In Futsal Tournament a hlawhtlin theih nana mi inphal tak takte chung ah lawmthu a sawi.

Enna In Futsal Tournament ah hian team 58 in hming pe lutin khel tur a inziaklut erawh team 42 an ni a. Hriat theih chin ah Kolasib khaw pawn atangin Team 9 an tel a ni. Tournament pet hawnna hun ah hian kalkhawmte hian Vote thlak tur a thu tiam (Voter Pledge) an la theuh bawk a ni.