Vawiin ni 28.6.2013 khan Aizawl Municipal Council-a Councillors te chu Chairman Pu CT Zakhuma kaihhruaiin AMC Session Hall-ah an thukhawm.

Meeting-ah hian Committee on Control of Parking and Collection of Parking Fee within Aizawl Municipal Council area din a ni a. Executive Councillor i/c Parking chu Chairman a ruat niin member atan Councillor pathum bakah CEO, AMC, SP Traffic leh Officer-in-charge - Traffic, AMC te ruat an ni. He Committee hian Aizawl khawpui chhunga Parking area tihdanglam chungchang te bakah a fee tihsan leh thil dang dang-ah AMC Board of Councillors-ah rawtna an thlen thin ang.

Board of Councillors Meeting chuan Aizawl khawpui huam chhunga khuarel hmun mawi bik - Tuithum luia Khawhpawp lengkir leh Tanhril rama Puk Inhawitawn te chu Recreation Cetre atan cheibawl ni se an ti a. AMC Building Regulations,2012-a siamthat ngai laite siamthatna tur an passed bawk. He an dan siamthat tur hi sorkarin a pawmpui hun chuan insa tuten in an sak hmaa in hmun an laih dawnin AMC phalna an lak zel a ngai tawh dawn a ni.

Vawiin Councillors Meeting-ah hian Resolutions engmawzat sawi hovin an pass a. Aizawl Master Plan - Vision 2030 chu AMC an pawm bawk.