Chief Minister Pu Lal Thanhawla chuan vawiin khan Local Administration Department enkawlna hnuaia siam Thenzawl Park chu a kawt Rest House hmunah lungphun khuhna pawtparhin a hawng.
Chief Minister chuan an sorkar hun reilote chhungin LAD-in hmalakna tamtak a nei a, he park hawn tak pawh hi a hnathawh rah pakhat ve mai a ni a ti a. Amusement Park hi Mizoram hmun remchang lai laiah engemawzah siam mek a ni a, a then chu hun reilotea hawn theih tum a ni a ti. Chief Minister chuan heng park siamte hi mi tupawhin an hun thawla an hawi khawthawnna tura tih a ni, a ti a. Sum siam tumna mai piah lamah thalaite leh kum lama upa deuhten intihhlimna atan leh han intih venna tura ruahman a ni, a ti.
Chief Minister chuan he park siam theihna tura Thenzawl khawtlang hruaituten sum phutna nei miah lova ram tha tak an pe chu Mizo zawng zawngte entawn tlak leh chawimawi tlak an ni, a ti a. A hmangtuten dimdawi taka hmang thin turin leh fai taka vawng thin turin a chah a. Hetiang ang park zau leh tha hi Aizawlah chuan a siamna tur hmun a awm tawh lo a ni a ti. Tourism-ah than kan tum a, chuvangin keini ringtute chu midangte entawn tlaka kan insiam a ngai a ni, a ti.
Khual zahawm Pu PC Lalthanliana, LAD Minister pawhin thu sawiin Thenzawl khaw mipuiin Mizorama park hman theih awmchhun an nei ta mai chu a lawmpui takzet a ni a ti a. Park an neih theihna chhan chu an bialtu hmalakna vang chauh a ni tiin a duhthusam erawh an puitlin sak theilo a ni a ti a. Sum hmuh nan ni lo mi zawng zawng an intihhlim theih nan leh an hawi thengthawt nana siam a ni a ti.
Thenzawl Park hi kum 2010 May thla atanga bul tan a ni a, Thenzawl Khuangpui Rama awm, a hmun zau zawng hi 46.29Bigha a ni a, a cheibawl nana sum sen zawng zawng chu Rs.205.33 lakhs a ni. Park-ah hian Rest House, Swimming Pool 2, Circular Bench 5, Pipu, Tawlhpahrit, Inbukna (See-Saw) te, Rest Shed 9 leh pangpar hmun te, thing tamtak phun a ni bawk a, tui lakna tha tak te leh thil dang thahnem tak siam a ni. Picnic duhte tan man chawia hman theih a ni bawk a. Naktuk atangin luhman lak tan nghal a ni dawn a, hetih lai hian Thenzawl school naupang bikte tan chuan thla khat chhung man chawi lova luh phalsak an ni ang.
Inkhawm hi Pu B.Lalhmingthanga, Secretary, LAD-in a kaihruai a, Pu K.Lianzuala, Chairman, KVI Board-in Chief Minister hi a tawiawm a ni.
Park hawnna hun hman zawh hian Chief Minister Pu Lal Thanhawla chuan ni 4 chhung awh Chief Minister Badminton Running Trophy and Ranking Tournament Serchhip Open 2013 kharna Thenzawl Joint YMA Hall-a neih chu a hmanpui nghal a. Tournament-ah hian category 16-ah khelh a ni a, Club 18 telin infiammi zawng zawng 151 an tel a ni. He tournament buatsaihna atan hian Chief Minister hian cheng nuai khat a pe a, LAD Minister-in cheng singkhat a pe bawk a. Mizoram Badminton Association-in cheng singnga an pe bawk a ni. Lawmmante hi Chief Minister leh LAD Minister-ten an hlan a ni.
