Vawin chhun dar 1:30 khan Pu Lalsawta School Education Minister chuan a office Chamber-ah Mizoram RMSA Web-Site thar chu a hawng.

He hunah hian thu sawiin, Pu Lalsawta chuan, “Mizoramah hian RMSA hi kum 2009-10 ah khan office te dinin bill tan chauh a ni a, chuti chungin Mizoram chhunga High School zirna atana a hnathawh te hi a chhuanawm hle a ni. Kum 2009 atanga vawiin ni thleng hian Govt. High School 199 te strengthening hnuaiah room chi hrang hrang sak belh a ni tawh a. An building hlui thenkhat te la awm bawk mahse Zoram dung leh vang ah zirna in, High School building thar hmuh tur tam tak a awm a ni.

RMSA awm atangin tun hmaa kan la neih ngai loh thingtlanga awm zirtirtu te tan Quarters 141 lai mai kan nei tawh a, kumin PAB in Quarters 49 lai mai min pek (approved) belh leh bawk a ni. Kum 2009 atang khan RMSA hnuaiah High School la awm lohna khua 81 laiah RMSA Secondary School thar kan neih belh tawh a. Heng High School thar a tan hian zirtirtu 532, Laboratory Attendant 280 leh School Clerk 81 te lak a ni tawh a, kan thalai lehkhathiam hna neilo heti zozai in hna an neih phah leh zirna tur High School kalna tur nei ngailo ten school leh zirtirtu tha tak tak mai an nei te hi achievement ropui tak a ni. Tunah High School thar 58 sak tur atana a vawikhatna atan leh Education Department din hnua a hmasa ber atan e-Tender kan chhuah thei te hi hmasawnna ropui tak a nih thu a sawi bakah, MHRD ten an ngiat ang a Civil works-ah E-Tender tih a ngaih avangin tlemin kan school thar sak tur thenkhat khawtlai deuh mahse Govt. of India-in a phut ang zel a kan ti thei te hi hmasawnna chhinchhiah tlak tak a ni. Vawiin hian India sawrkar in RMSA hnuaia achievement tlangzarhna lehkha (pamphlet) a siam hmasak ber a, achievement pholanna a pho lanna thlalak 4 zingah Mizoram RMSA hnathawh thlalak 3 lai mai an hmangte hi a ropui hle a ni,” a ti bawk.

He Website hawnna programme hi Pu P. Lalchhuanga IAS, Director, School Education Dept. in a kaihruaia, khualzahawm Pu K. Lalnghinglova IAS, Secretary School education Dept in thusawina nun a hmang a, Pu Lalhmachhuana Addl.State Project Director hnen atangin website buatsaih dan chungchang ngaihthlak a nih hnuah Pu C.Chawngthantluanga Dy.State Project Director in lawmthu sawina hun hmangin hnu a khar a ni.

Website ah hian RMSA chanchin leh hmalakna hrang hrang tarlan a ni a. School Data, School atanga DCF(Data Capture Format) hmanga lak khawm te tarlan a ni. RMSA hnuaia hmalakna leh Building sak tawh hrang hrang dah luh vek a ni bawk. Tin, he website atang hian RMSA hnuaia tender chi reng reng (e-Tendering) hmuh theih/en theih vek a ni. RMSA Website hi a URL chu rmsa.mizoram.gov.in a ni.

Website hawnnaah hian School Education Department officer te leh RMSA leh SSA official te an tel kim hle.