1017/2026-2027

Dated Aizawl, the 16th June 2026: Vawiin khan AMC Mayor Pu H. Lalremtluanga chuan Edenthar BSUP, Aizawla ‘Stop Diarrhoea Campaign 2026’ hawnna inkhawm chu khuallian niin a hmanpui.

Pu H. Lalremtluanga chuan he campaign a hmanpui thei chu lawmawm a tih thu a sawi a, kawthalo laka invenhim a pawimawhzia sawiin kawthaloin nunna a suat thin chu umbo theih a ni a, heng atan hian inzirtirna kalpui zel a pawimawh, a ti a. PHE department te, Health department te leh AMC te chuan mipuite hriselna leh faina turin ke an pen zel thin thu a sawi a. Kawthalo hi natna tlanglawn tak ni mah se kum 2025 chhungin India ram pumah naupang nuai 1.2 laiin an thihpui chu pawi a ti a, ORS leh zinc damdawi hmanga inenkawl a pawimawhzia sawiin National Health Mission hnuaia sawrkar Sub-centre leh ASHA (Accredited Social Health Activists) thawktute atang zinc tablets leh ORS chu a thlawnin lak theih reng a ni, a ti a. Mayor chuan AMC-in PSUB-a chengte chu a ngaipawimawh a, hma an sawn zel nan hmalak a inhuam tlat thu leh thawhhona tha tak an neih theih a beisei thu a sawi bawk.

He programme-ah hian ‘Kawthalo ven nan faina leh ORS a pawimawh’ tih thupui atan hman niin, National Health Mission (NHM) hnuaia Aizawl East District Chief Medical Officer (CMO) office huaihawt a ni. ‘Stop Diarrhoea Campaign 2026’ hi hriselna lama mipui zirtirna campaign Ministry of Health and Family Welfare huaihawt niin, naute leh naupang kawthalo vanga an thihna thleng thin chu tihtawp a nih theihna tura an hmalakna a ni. He campaign hi ram pum huap campaign niin June ni 16 atanga July ni 31, 2026 thleng hman a ni dawn a ni.

Vawiin launch campaign hi Aizawl East District Sr. CMO Dr. Lalhlunpuii chu chairperson niin a kaihruai a, Dr Lucy Lalsangpuii chuan ‘Stop Diarrhoea Campaign 2026’ chungchanga inzirtirna chu presentation hmangin a sawifiah a. Pi Lalnuntluangi, District Programme Manager, NHM, CMO East chuan lawmthu sawinain he hun a khar a ni.