Nimin khan All Mizoram Farmers’ Union (AMFU) chuan an kum 25 tlin champhaphak silver jubilee lawmna hun chu Central YMA Hall, Aizawlah an hmang a. Mizoram Deputy Chief Minister Pu Tawnluia chu khuallian niin Agriculture Development Board Vice Chairman Pu H.Biakzaua, Lawngtlai East bialtu MLA pawhin he hun hi a hmanpui a ni.

Pu Tawnluia chuan ram hmasawnna bul chu agriculture-ah a innghat thuk em em tiin ei leh bar, silh leh fen, sum leh paia ram mipuite intodelhna tur khawp hi kan ram leilungah a awm a ni, a ti. Deputy Chief Minister chuan Mizoram Sawrkar hmalakna pui ber SEDP hmangin Mizoram chu ei leh barah intodelha siam tum a ni a, chumi hlawhtlin theihna turin AMFU te an pawimawh hle, a ti a. Leileta siam theih ram chhunga la awm te cheibawlin hlawk zawka buh thar chhuah te, buh seng hnua thlasik thlai chin te, thei leh thlai thar chhuah vawn that leh sawngbawlte, man man zawka hralh chhuah dan kawng zawnte chu sawrkarin a ngaih pawimawh berte zingah a tel thu sawiin AMFU te nen chuan tum thuhmun, Mizoram a intodelh theih nana tan la mek an nih angin thawhhopuiah Deputy Chief Minister Pu Tawnluia chuan a sawm a ni.

Pu H.Biakzaua chuan leilungah hausakna awm mahse tlawh pawhna tur kawng a awm loh chuan hlutna a nei lo tiin kan kawng neih sa chei that piah lamah thlai thar phurhna tur kawng siam belh tul a tih thu a sawi a. Buh leh thlai thar chhuah hralhna tur ngaihtuah leh thlai chin tur thlan fimkhur te chu intodelhna atana kawng pawimawh nia a a hriat thu a sawi. Agriculture Development Board Vice Chairman chuan AMFU chu tawn hriat nei tha, thil tam tak zirchiang tawh an nih angin sawrkar finchhuah a, thlawp tlat turin kalkhawmte a sawm a ni.

Nimin programme hi AMFU Sr. Vice President Dr Chawngkhuma Chawngthu chuan a kaihruai a. An pawl President lo ni tawh Pu Vanlalngaia, Pu Chalngura Jahau leh Pu R.Lalduhawma te hnenah chawimawina thuziak an hlan a. Silver Jubilee Souvenir an buatsaih chu khuallian Deputy Chief Minister Pu Tawnluia’n a tlangzarh nghal bawk a ni. AMFU Silver Jubilee hmang tur hian Mizoram hmun hrang hrang atangin AMFU member-te an kalkhawm a ni.