Nimin (November 12, 2019) khan Kolkata Mizo Zirlaite'n an kum 70 tlinna (Platinum Jubilee) IB Ground, Sector-3, Salt Lake, Kolkata-ah an lawm a, Pu Robert Romawia Royte, Minister-in Khuallian niin a hmanpui.

Pu Robert Romawia Royte chuan Kolkata-a Mizo zirlai awmte duhsakna leh kum 70 an tlin lawmpuina chibai a buk a. Zirlai kalkhawmte chu an zirlaiah theihtawp chhuaha, Mizo hnam leh Mizoram tihming thatu ni tur leh an zirna leh hnathawhna kawng tinrengah Pathian tihna nei a, fimkhur leh rilru nei taka hun hmang turin a chah a ni. 

Tourism Minister Pu Robert Romawia Royte chuan Kolkata khawpuia Zo chi peng hrang hrangte huapin Zokutpui buatsaih tum a ni tih sawiin, hei hi Zofate inpawh tawn nan leh insuihkhawm nana pawimawh a nih piah lamah khawvel huapa Mizo hnam leh Mizoram a tha zawnga phochhuahna tha tak a nih tur thu a sawi a. Minister chuan Mizoram Sorkarin Kolkata khawpui pawimawhna hriain Mizoram House building thar tha tak sa tura hma a lak mek thu a sawi bawk. India ram khawpui dang aia Kolkata khawpuiah Mizote an tlangtla bik nia a hriat thu sawiin a chhan nia lang chu Kolkata khawpuiin an ngaihsan tak tak Mizo Footballers te vang a ni a ti. Zirlai kalkhawmte chu hnam dangte kawm thiama an tawng te pawh thiam turin a fuih a, Mizote tizahawmtu ni zel turin Kolkata Zirlaite chuan remchanna leh theihna in nei a ni a ti. Minister chuan zirlai thenkhat kan sakhaw hun pawimawh Krismas leh Kumthar hunah pawh mahni khuaa haw chak tawh lem lo an awm thin tih sawiin Zoramah zu zawrh tihtawp a nih tawh avangin kumin atang chuan Krismas nuam zawk leh hlimawm zawk Zoramah kan hmang dawn a, khawvel hmun hrang hrangah Mizo thalaite Zorama Krismas leh Kumthar chawlh rawn hmang vek turin Tourism Minister chuan a sawm a, Hnam dang thiante pawh Zorama Krismas leh Kumthar hmang turin i sawm ang u a ti.

KMS Platinum Jubilee lawmna inkhawm hi KMS President Tv. Malsawmkima Zathang-in a kaihruaia, Pu H.Lallien Songate, IRS chu khualzahawm niin, KMS G.S. Tv. Joshua T.Lalropuia'n report a pe a. Kum 1949 khan Cacutta-ah hian Mizo Zirlai Pawl hmingin a lo ding a, chu chu a hnuah Calcutta Mizo Students tih ni lehin, kum 2002 atang khan tuna a hming Kolkata Mizo Students tih hi a lo pu ta a ni. KMS hian West Bengal state-a District 23-a Mizo zirlaite a huam a ni.

ICT Minister Pu Roberta hian Platinum Jubilee lawmna hun a hmanpui zawh hian ni 15.11.2019-a Union Sports Minister-in New Delhi-a State hrang hrang Sports Minister Conference a kohnaa tel tur leh Central Ministry-a project hrang hrang bawhzui turin Delhi a pan nghal a ni.

Attachment

  • Loading attachment...