Lawngtlai Deputy Commissioner office leh District Child Protection Unit (DCPU) tang kawp huaihawtin vawiin khan Lawngtlaia Central YLA Hall-ah HIMNA-MADAT (Mizoram Against Drugs, Alcohol & Tobacco) Project hnuaia hma lakna peng khat atan thalaite fuih phurna hun 'Youth Empowerment Summit 2019' buatsaih a ni.

Lawngtlai Sub-Divisional Officer (Sadar) Pi Rochuangkimi Khenglawt chuan hawnna thu sawiin, Youth Empowerment Summit chu thalai nakin lawka duhthlanna la siam turte kawng kawhhmuhtu atana buatsaih a nih thu a sawi a. Sawrkar hna kher lo pawh ei zawnna bul tanna tur tam tak a awm tih thalaite'n an hriat a, bul tan dan an thiam theih nan leh an tui zawng ei zawnna thlang thiam tura kaihruaitu a nih a beisei thu a sawi. HIMNA-MADAT chu zu leh ruihhlo laka thalaite an him theihna tura sawrkar hma lakna pawimawh tak a nih thu sawiin, ruihhlo chu changkanna ni lovin, nun tichhetu a ni a, hlawhtling tur chuan ruihhlo laka fihlim ngei ngei a ngai tih hre turin zirlai kal khawmte chu a chah bawk.

He hunah hian District Child Protection Officer Pi Mary Lalremruati'n inlawmna thu sawiin, Lai Autonomous District Council (LADC) hnuaia Lai House, Aizawla Assistant Resident Commissioner Pu David A. Lalhmingchhuana'n thalaite fuih phurna thu a sawi a. Panel discussion hun hnih buatsaih niin, zawhna leh chhanna hun hlawk tak hman a ni a. Protection Officer (Non-Institutional Care) Pi Zohlimpuii Hmar chuan lawm thu sawiin, hun khar a ni.

He hunah hian Lawngtlai khawpui chunga zirlai thahnem tak an fuan khawm a. Panel discussion hun hmasa zawkah hian 'Kan thei chiang' (Yes, We Can) tih thupui hmangin Lawngtlaia sawrkar hna thawk leh infiam mi hlawhtlingte'n sawi hona hun an hmang a. Hun hnihnaah 'I kawng insial rawh' (Invent Yourself) tih thupui hmangin Lawngtlai thalai mahni thiam thil hmanga ei zawnna kalpui mekte'n sawi hona hun an hmang ve thung a ni.