Vawiin hian Lungkawlh Community Hall ah Lungkawlh Branch YMA kum 75 na (Platinum Jubilee) champha lawmna buatsaih a ni a. Pu. Lalruatkima, Minister of State, I&PR, RD, etc chuan khuallian niin a hman pui.

Vawiina Jubilee lawmna inkhawm Pu CV Lalrengliana, President, Branch YMA kaihhruaiah hian Minister chuan, Lungkawlh khawtlang mipuite chu Jubilee chibai a buk a, Lungkawlh tana ni chhinchhiah tlak takah khuallian tura an sawm avangin lawmthu a sawi. Jubilee chu saltang te tana zalenna nen a inkawp rem thin a, vawiinah hian kan khawtlangah lo mu lum zo lo harsatna sala tang mek te kan lo awm palh thei a, kan thinlungin mil loh leh inrempui theih loh a neih vanga thinlung lam saltang kan lo ni reng thei bawk. Chuti ang saltanna nei te tanpuina hun remchangah  te, midangte rem taka kan nun pui thar lehna remchangah te leh a tha zawnga hriatreng tlak thil hlu tihna hun thaah te he Jubilee hi hman tum ila, Jubilee hlu tak kan hmang dawn tihna a ni tiin Lungkawlh mipuite a sawm a ni.  Pu Lalruatkima chuan, Lungkawlh khawtlang, khaw hlun leh upa tak, kum 150 na lawm mai tura inpuahchah mek hi Rural Development Department chuan nasa takin a vur dawn tih a sawi a. Border Area Development Fund (BADP) sum hmangin Tiau  lui panna kawng te,  huan lo ram panna kawngte, khaw chhunga school building thar te, tuikhur te leh thil dang ruahmanna engemawzat a awm a, in nihlawh hle a ni, a ti. YMA lo din tan dan leh a lo din chhan te, khawtlang tinin vawiin thlenga kan tangkai pui zia te sawiin; YMA hi nei lo ila he ram dinhmun hi chu a chhe hlein ka ring a, YMA tel lo chuan chhiat ni leh that nia mahni intuamhlawm zo lo chhungkua tam tak kan awm hialin a rin thu a sawi. Minister chuan, YMA te hi roreltu tur kan nilova roreltute tha taka thawhpui chunga ram leh hnam humhalh tur kan ni, a ti. Kan rama thing leh mau te, tuihna te kan humhalh zel ang a,  Pathian min pek kan ram hi nghet taka kan luah zel theih nan inthlah pun deuh deuh kan ngai a, kan chhehvelah ram neilo hnam lian tak tak an awm phung a ni tih hrerengin kan ram kan hnam hi duat takin kan enkawl a tul a ni, a ti. Zirna hlut zia sawiin Pu Lalruatkima chuan, zirna leh thiamna hian engkim a sithlu thei a, ram leh hnam humhalh nan pawh zirna bawk hi kawng pawimawh chu a ni a, khawtlang hian zirna ngaihlu ila kan zirlai naupangte duat ila, lehkhathiam te i ngaisang deuh deuh ang u. Vawiinah Mobile phone hian kan hun zawng zawng min eiral sak ta emaw tih turin kan awm mek a, heng thil kan buaipui zat hi lehkha zirna hunah hmang ila, lehkhathiam ramah kan chhuak thei hialin a rinawm, a ti. Zofate kan vannei hle tih sawiin Myanmar rama zofate, Assam leh NE state danga zofate, Bangladesh rama zofate pawh Kristian kan ni deuh vek mai a, heng lai khawvela zofate kan ral mai loh nana Pathian malsawmna nia a hriat thu sawiin, Pathian remruatna lo awm zel tur tuman kan hre phak lova, engtik niah emaw chuan rorelna pakhat hnuaiah min la chhungkhawm lovang tih kan sawi thei lo a ni, a ti. Hmasawnna leh changkanna hi rilru lam atanga intan nia a hriat thusawiin vawiinah hian rilru dik tak pua ram leh khawtlang tana mi tangkai nih thar i tum theuh ang u, tiin mipuite a sawm a ni. Pu Lalruatkima hian Lungkawlh MUP hnenah Pawndum leina tur pawisa a pe a, Branch YMA hnenah Jubilee senso phuhrukna tur thilpek a hlan bawk.

Minister hi Aizawl atangin Pu Lalnunhlua, Jt. Director, RD in a rawn tawiawma, Serchhip atangin Pu H. Dolianbuaia, PD, DRDA, Pu K. Saitluanga, DIPRO, Pu David Zodingliana, AE, DRDA ten tawiawmin Lungdar atangin BDO Pu. H. Lalhruaitluanga'n a tawiawm bawk a ni.

Jubilee hi nizan atangin Lungkawlh khawtlang hian an lawm tan a, tukin zingkarah Jubilee lungphun hawnna te neiin chhunah hian vantlang inkhawm an nei leh ta a ni. Jubilee Souvenir chu Lungkawlh khawchhuak AMC Councillor ni tawh, Lungkawlh lal hnuhnung ber Lalkanglova tunu ni bawk Pi F. Lalhuthangi'n a tlangzarh a. Hruaitu hluite chawimawina hun an nei bawk. Tlai lamah khawtlang huapin ruai an theh a, zaninah vantlang inkhawm nei lehin Jubilee lawmna an khar ang.

Lungkawlh khua hi N. Vanlaiphai chhak, Hrangturzo tlang chhim lama awm a ni a, tun ah hian in 160 vel awmin mihring 850 vel an cheng mek a, YMA member hi 536 an awm mek a ni.