Vawiin chawhnu khan Kolasib District Football Association buatsaih MLA Cup 2019 Kolasib Constituency Inter Village Football Tournament kick off-na hun Parish Hall, Venglai, Kolasib ah hman a ni a, Pu K Lalrinliana, Minister of State for Food, Civil Supplies & Consumer Affairs department, bialtu MLA ni bawk chu khuallian a ni.

Khuallian Pu K Lalrinliana, bialtu MLA ni bawk chuan MLA Cup 2019 chu Kolasib Assembly Constituency chhunga infiammite inphochhuahna leh intuaihriamna hun tha a nih a beisei thu a sawi a, infiamna kaltlanga inpawhna, inhmelhriatna leh inunauna tha siam turin duhsakna a hlan bawk a ni. Minister chuan Mizoram State Games hmasa ber atan inpuahchahna ngawrh taka kalpui a nih thu a sawi a, Kolasib Constituency a infiammite chu State Games ah dinhmun tha tak hauh tum a tan la turin a chah bawk a ni.

Tournament kick off-na hun hi Pu Lalliansanga, Joint Secretary, KDFA in a kaihruaia Pu Lalhmingchhuanga, Honorary Secretary in kalkhawmte lawmna thu sawiin Village Council Jersey tlangzarhna hun te neih a ni a, team hrang hrang aiawhten thutiam te la in Pu Vanlalsawma, President, KDFA in lawmthu sawiin hun kharna a hmang bawk a ni.

MLA CUP 2019 Kolasib Constituency Inter Village Football Tournament-ah hian Kolasib Constituency chhunga Village Council football team 15 leh New Builum Village Council team te an tel a, hmeichhe team 6 an tel bawk a ni. Kolasib distrcit chhungah MLA CUP hi vawi 5 buatsaih tawh niin tun tum hi a vawi 6-na tur a ni a, MLA Cup 2019 chu Mizoram State Games a Kolasib Constituency a tel tur thlan chhuahna hmanraw tangkai tak a nih tur thu KDFA hotute chuan an sawi a ni.