Vawiin khan Synod Conference Centre-ah Anganwadi Workers hna thawk tha mi panga thlanchhuahte hnenah State Level Best Anganwadi Workers Award 2016-2017 hlan a ni a. Hemi puala inkhawm buatsaihah Social Welfare Minister Pu PC Lalthanliana chu khuallian a ni.

Pu PC Lalthanliana chuan Anganwadi Centre-te hi Mizoram tan hriselna leh zirna bulthut pawimawh an ni a, Centre kaltlanga sawrkarin nutrition a sem avangin thingtlang kilkhawr ber thlengin naupangin eitur tha leh hrisel an hmu a, vitamin tlakchham avanga cher chhe tak tak hmu tur an awm tawh lo, a ti.  Anganwadi Workers-te chu thlahdah taka hnathawk thei an ni lo tih leh rawngbawlna leh hmangaihna rilru pua thawk tur an nihzia sawiin a dawng tur dik tak ten an thilsem an dawn theih nan rinawm taka hnathawk turin Minister chuan a fuih a. Anganwadi Centre sanghnih chuang ten dinhmun tha zawka an din a, hma an sawn theih nan theih tawp chhuah theuh turin a sawm a ni.

Social Welfare Minister chuan 1.4.2017 atangin Anganwadi Workers leh Helpers-te chu tuna hlawh an lak mek atanga chhutin za zelah 10 in an hlawh tih pun a nih tur thu he hunah hian a sawi a. Supervisor/Circle Officer post 25% chu kum 10 Anganwadi Worker-a lo thawk tawh, Matric pass chin tan Circle Officer-ah an kai theih nan dah a nih angin tunah hian Anganwadi Worker mi pakua kaisanna tur bawhzui mek a ni, a ti bawk.

State Level Best Anganwadi Workers award 2016-2017 dawngtute chu C.T.Vanlalhruaii, Vairengte-II, Bilkhawthlir ICDS Project; Lalbelsangi, Mamit-II, Zawlnuam ICDS Project; Lalthanthiangi, Kanan-I, Champhai, ICDS Project; Lalhmingmawii, Khawkawn-II, Ngopa ICDS Project leh Sangkimi, Bualte-I, Lunglei ICDS Project te an ni.  He Award hian pawisa fai Rs.5000, citation leh lawmpuina thilpek a keng tel a ni.

Sawrkar laipui chuan nu naupai, nau pawm, hmeichhe tleirawl leh naupang kum 6 hnuailam ten hriselna leh eitur tha an hmuh theih nan AWW (Anganwadi Workers) te hnathawh tangkaizia leh hlawk zia hriain a thawk thate chawimawina atan kum 1995 atangin national leh state level-ah Award a buatsaih tan a. Mahse chhunzawm lohvin rei tak a awm hnuah kum 2001-2002 atang khan mumal taka kum tin award hi sem thin a lo ni ta a ni. National Award hi Mizoram atangin AWW hnathawk tha 17 in an dawng tawh a, kum 2015-16 thleng khan State Award hi mi 97 hnenah hlan a ni tawh bawk. State level best AWW Award chu India ram State tinah thlang chhuakin chung zing atang chuan National Level Award dawng thei tur chu sawrkar laipuiin a lo thlang chhuak leh thin a ni. Tun tuma State Award dawngtu mi panga atang hian National Award dawng tur mi pathum chhawpchhuak an ni dawn a. National Award hian Rs.25,000 leh citation a keng tel a, New Delhi-ah hlan thin a ni.