March ni 7 & ni 9 khan Auxiliary Nurse Midwifery (ANM) School, Lawngtlai chuan Student Nurses Association (SNA) Sport 2019 chu an school campus-ah buatsaihin, vawiin chawhnu khan a kharna hun an hmang.

He hun hi School Principal Pi C. Rothangpuii chuan kaihruaiin, SNA chu India ram puma nursing leh auxiliary nurse zirlaite inzawm khawmna pawl a nih thu leh zirlaite inpawh tlan nan leh kawng hrang hranga an theihna hai chhuah nan SNA sport buatsaih ?hin a nih thu a sawi a. ANM Lawngtlai pawhin huau huau an lawm fal bik vanga hmang ni lovin, SNA kalphung zuia an unit tan bik lo buatsaih ve an nih thu a sawi.

He hun hmanpuitu Lawngtlai DIPRO Pu C. Lalhruaitluanga chuan fuihna thu sawiin, zirlaite chu an nun kawng hman chhoh zel turah duh thlanna thiang tak hmanga an kawng zawh tur thlang a, rilru nghet tak pu turin a chah.

SNA Lawngtlai Unit sport-ah hian zirlaite chu house pathum - blue, red leh yellow-ah te in?henin, outdoor item 9 leh indoor item 8 hmangin an inel a. A pumpuiah yellow house chu pakhatna niin, pahnihna red house leh pathumna blue house an ni.

"Student of the year 2018-19" atan 2nd year zirlai Betty C. Lalruatsangi thlan a ni a. 2nd year zirlai Vanlaldiki Khiangte chu best player niin, 1st year zirlai H. Lalhriatrengi chu Miss Personality-ah thlan a ni a. Miss 1st runner up-ah 2nd year zirlai Betty C. Lalruatsangi leh 2nd runner up-ah 2nd year zirlai Lalrinsiami te thlan an ni bawk.

ANM School Lawngtlai hi kum 2017-18 session khan din niin, session hnihna an kal mek a. Batch khatah seat 20 awmin, tunah hian 2nd year zirlai 19 leh 1st year zirlai 20 an awm mek. ANM hi kum 2 zir a ni a; ANM School Lawngtlai 1st batch hian nikum khan result ?ha tak neiin, zirlai zawng zawng an pass kim vek bakah, Mizoram puma ANM zirna sikul 3 zingah top 10-ah 6 an lang a ni.