Ni 9.3.2019 (Inrinni) khan Darlawn khawtlangin Chapchar Kut an hmang a, Pu Lalchhandama Ralte, School Education Minister chu 'Kut Pa' a ni.
    
Minister chuan he hunah hian thusawiin Chapchar Kut kan neih hian thawnthu hlui lama uai let mai lova, zu leh sa leh nawmchenna leh kut behbawma buai lova, kan hnam leh sakhaw mil zawnga kan hman a pawimawh a ti a. Kut hian Zo hnam thinlung put let lehna min pe a, hun lo kal turah uar deuh deuh pawh a tul a ni a ti. Zofate hi ram bung hmun hrang hrangah thendarhin kan awm a, Zofate hi rorelna pakhat hnuaiah awm thei rih lo mah ila, unau kan nihna tuai thar leh te, culture vawn nun te leh hnam rohlu vawn nun te hi Chapchar Kut  hian a thuchah ken a ni a ti bawk.
      
Minister chuan Chapchar kut kan hman hian hnam anga tangrual tura thutiam min neihtirtu a nih a pawimawh a. He kut hi a tha lam zawnga rual el nan kan hman a tul a ti bawk. Pu Lalchhandama Ralte chuan sawrkar hian hmasawnna tur thawk mahse, a chhunga cheng mihringte thinlung hian hma a sawn loh chuan hmasawnna kairual lo a ni ang a, chuvang chuan hnam, chi, politics leh kohhran pawl dah thaa, kut kan hman hi hnam anga rual elna lo chang se a duh thu a sawi a. Khawvelin hma a sawn ang zelin hma lam thlirna min neihtirtu, min tanrualtirtu ni thei turin chapchar kut kan hman hian tum kan neih a tul a ni a ti bawk.
     
Darlawn khawtlangin chapchar kut an hmanah hian Pu Lallianzuala, DFO Darlawn chu kut thlengtu a ni a. Cheraw kanpui YMA ten an entir a, chheilam te, mal zai leh item chi hrang entir a ni. Kutah hian khawtlang mipuite bakah Darlawn khaw chheh vela mite pawh an tel a ni.

Attachment

  • Loading attachment...