Anthurium festival 2011 chu vawiin khan Reiek Tourist Resort ah tan a ni ta. He kut ni thum chhung awh tur hi khuallian Finance Minister Pu H. Liansailova chuan a hawng a, Dampa bialtu MLA, ZIDCO Chairman ni bawk Pu VL. Robiaka chu khual zahawm a ni.

Pu H. Liansailova chuan Anthurium Festival hmang tute chibai bukin he kut hi India ram hmun dang te leh ram pawna kan ram thar chhuah Anthurium thawn chhuak zel thei tura hmalakna tichaktu tangkai tak a ni, a ti a. He Festival hi khualzin mi te hipa Mizoramah Tourism a than len zel theihna tur te, Mizorama cheng hnam hrang hrang te inpumkhatna tinghet tu tur leh ram mipui te eizawnna tur Anthurium thar chhuah kawnga puitu tangkai tak a ni, a ti bawk. Minister chuan Himachal Pradesh, Kashmir, Darjeeling leh India ram hmun thenkhatah mi tam takin Anthurium hi eizawn nana hmangin an ram economy siam thatna tur khawpin an thatpui tawh a, Mizoram pawh chutiang dinhmuna a din ve theih nan sorkar in hma a la a, he an hmalakna hi mipui te tan vek a ni tih hriaa thlawp tlat turin a ngen a ni. NLUP chungchang tarlang nghalin Pu H. Liansailova chuan kuthnathawka eizawngte chu thlamuang taka awm turin leh sum pawh dik tak leh rinawm taka an hmang a nih phawt chuan an hman tur khawp chu a awm reng thu a sawi a. NLUP thawh hnihna (2nd Phase)-ah chhungkaw 45,000 thlan chhuah an tum thu leh a la bang zawng chhungkua te chu 2013 hmaa tuam chhuah vek an tum thu a tarlang nghal bawk a ni.

He huna thusawitu dang Tourism Minister Pu S. Hiato pawhin Anthurium Festival chu Tourism tihmasawnna tur atan sorkar laipui sum senga buatsaih anih thu tarlangin mikhualte duat thiam a, an lakah Mizo nun zemawi lan chhuahtir a tul thu a sawi a. Khualzin mite hipa, an rosum te Mizoram chhunga a tam thei ang ber kan hman tir theih phawt chuan mipui ten kan chhawr anga, kan State sum leh pai dinhmun pawhin nasa takin hma a sawn phah dawn a ni, a ti bawk.

Khualzahawm MLA Pu VL Robiaka pawhin Kut hlawhtling taka hawn a ni chu lawmawm a tih thu leh a buatsaih tute thawhrimna fakawm a tih thu a sawi a. He kut hian Mizorama cheng hnam chi hrang hrang te karah inunauna a thlen a beisei thu sawiin hmasawnna tak tak ram in a neih theih nan inpumkhat a tul a ni, a ti.

He festival-ah hian Mizo Cultural Organisation, Chakma Cultural Troupe leh Mizoram Gorkha Youth Association ten hnamlam chi hrang hrang an entir a. MZI Reiek leh zaithiam lar tak tak ten kalkhawm te chu hla leh rimawi chi hrang hrang hmangin an awi a. Mipui a duh apiang tana tel theihna Air Rifle leh thal inkahsiak bakah thing inlawnsiak thlengin he kutah hian en tur a awm a ni.

Festival hawnna inkhawm hi Tourism changtu Parliamentary Secretary Pu H. Zothangliana’n a kaihruai a, Tourism Secretary Pi B.Sairengpuii leh sorkar mi pawimawh tak tak te bakah mipui thahnem takin kut hi an chhim a ni.

Zirtawpni leh Inrinni hian Anthurium Festival hi hman chhunzawm a ni dawn a, Zirtawpniah Chief Secretary Pu Vanhela Pachuau chuan a hmanpui anga, Inrinni hian Chief Minister Pu Lal Thanhawla’n Anthurium Festival hi a khar ang.