Tourism Department huaihawt ni thum awh tur Anthurium Festival, Reiek Tourist Resort a neih mek chu a ni hnihna vawiin khan Trade and Commerce Minister Pu Lalrinliana Sailo chuan khuallian chan changin a hmanpui a, khualzahawm chu ZIDCO Chairman Pu Lalrobiaka a ni.

Festival pual inkhawm a thu a sawinaah Minister Pu Lalrinliana Sailo chuan Mizoram dehchhuak dik tak, Anthurium pangpar hmingchawia kutpui kan ur thei chu kuthnathawktute tan hmabak eng tak a awm zia a pholang a ni, a ti. Khawpui changkang leh hmasawn zawkah te chuan a mi cheng ten khawpui boruak rit tak tlanbosana khawi maw laia hawi thawvenna hmun nuam tak an buatsaih thin a, chutiang bawkin Aizawl khawpui chep leh bengchheng tak laka hun hlimawm leh thawveng hman duh chang atan Reiek Resort, Tourism Department in a buatsaih hi a lawmawm takzet a, thalai leh khualzin veivak te tan pawh hmun thlanawm tak a nih zui zel a duhsakna a hlan a ni.

Khualzahawm, ZIDCO Chairman Pu Lalrobiaka, Dampa bialtu MLA ni bawk pawhin thu sawiin kalkhawm te hlim taka Kut hmang turin a sawm a. Kut hlawhtling taka buatsaihtu Tourism Department-te thawhrimna fakin taimakna leh thahnemngaihna hi engkim hlawhtlinna bul a ni, a ti. Mizoram chhunga hnam hrang hrang kut chhim tura lo kalkhawm te chuan hnam inpumkhatna leh inunauna a thlen ngei a beisei thu Pu Lalrobiaka chuan a sawi bawk.

Parliamentary Secretary(Tourism) Pu H Zothangliana, State CIC Pu Laldingliana IFS(Retd), Secretary Tourism Pi B Sairengpuii bakah Assam Rifles hotu thenkhat te pawhin kut hi an chhim a ni.

Vawiinah chuan Mizo Cultural Organisation, Lai Cultural Troupe, Chakma Cultural Troupe leh Mizoram Gorkha Youth Association ten hnamlam chi hrang hrang an entir a.YMA Ailawng Branch leh zaithiam lar tak tak ten kalkhawm te chu hla leh rimawi chi hrang hrang in an awi a, Heritage Handloom & Handicraft buatsaih Fashion Show hmuhnawm tak thlir tur a awm bawk a ni. Vawiina mit la zual deuh te chu PC Girls School in pawnto an entir te, Tuikual South Teenage Club ten Dawhzawm lam leh Mount Carmel School naupang ten tunlai lam an entir te chu a ni. Mipui chanvo hun hlimawm tak pawh siam a ni bawk.

Anthurium Festival ni thumna leh a kharna hun chu naktukah neih leh a ni anga, Mizoram Chief Minister Pu Lal Thanhawla chu khuallian tura beisei a ni. Festival hi a duh apiang tan a thlawna tlawh theih a ni.